Малітоўная мабілізацыя аб супакоі і нацыянальным прымірэнні аб’яўлена ў Буркіна Фасо

05.11.2014 11:37

Аб вяртанні супакою і бяспекі, а таксама аб нацыянальным прымірэнні распачалася малітва жыхароў Буркіна Фасо — заходнеафрыканскай краіны. Навэнна, якой пачалі маліцца 2 лістапада, праводзіцца ў касцёлах пасля кожнай святой Імшы. Гэту малітоўную мабілізацыю аб’явіў кардынал Філіп Уэдраога пасля таго, як у Буркіна Фасо аб’явілі надзвычайнае становішча і быў распушчаны ўрад. Пра гэта паведамляе польскае інфармацыйнае агенцтва. Напружаная сітуацыя была выклікана хваляй агульнацыянальных выступленняў супраць увядзення ўрадам заканадаўчых змен, дзякуючы якім прэзідэнт Блэза Кампаарэ, які займае сваю пасаду на працягу 27 гадоў, будзе мець права прэтэндаваць на новы тэрмін. Існуюць асцярогі, што супрацьстаянне паміж урадавымі сіламі і апазіцыяй можа прывесці да павелічэння гвалту. Заклікаючы да малітвы, арцыбіскуп Уагадугу (сталіцы Буркіна Фасо) заахвочвае таксама да канструктыўнага дыялогу і сапраўднага клопату аб дабрабыце краіны. «Мы ўсе нясём адказнасць за будучыню нашай краіны, і павінны пераадолець гэтыя цяжкія моманты», — напісаў у сваім пасланні кардынал Філіп Уэдраога. (AYU)