20–23 ліпеня 2010 г. у Санта Дамінга, сталіцы Дамініканскай Рэспублікі, адбудзецца пасяджэнне папскага фонду «Populorum Progressio». Яно будзе прысвечана абмеркаванню праектаў развіцця супольнасцяў жыхароў Лацінскай Амерыкі і Карыбскіх астравоў. Удзельнікі пасяджэння наведаюць і суседнюю краіну — Гаіці, у якой фонд штогод праводзіць шматлікія дабрачынныя праекты.

Падчас візіту ў Гаіці члены фонду наведаюць каталіцкія лагеры для бежанцаў, у адным з якіх адбудзецца святая Імша з удзелам прадстаўнікоў мясцовага Касцёла. Запланавана таксама сустрэча з прадстаўнікамі мясцовых дабрачынных арганізацый.

Старшыня Папскай рады «Cor Unum» і фонду «Populorum Progressio» кардынал Пауль Ёзаф Кордэс падчас наведвання сядзібы мясцовага «Карытас» ад імя Святога Айца перадасць яе кіраўнікам 250 тысяч долараў. Гэты дар стане пачаткам адбудовы знішчанай у выніку землятрусу школы св. Францішка Сальскага ў сталіцы краіны.  

Фонд «Populorum Progressio» быў заснаваны 13 лютага 1992 г. папам Янам Паўлам ІІ з нагоды 500-годдзя адкрыцця Амерыкі і распачацця яе евангелізацыі. Фонд падпарадкоўваецца Папскай радзе «Cor Unum». Яго мэтай з’яўляецца эканамічная падтрымка найбольш бедных супольнасцяў Лацінскай Амерыкі.