Перад святамі Божага Нараджэння Папа Францішак заклікаў браць прыклад з Панны Марыі і даць месца Езусу, які прыходзіць. Падчас ранішняй Эўхарыстыі ў Доме св. Марты 23 снежня Пантыфік параўнаў Касцёл з Марыяй, якая чакала нараджэння свайго Сына.

Постаці св. Юзафа, апекуна Езуса, прысвяціў Папа Францішак свае разважанні перад малітвай “Анёл Панскі” 22 снежня. Па словах Пантыфіка, сілай гэтага святога чалавека было яго радыкальнае імкненне да выканання Божай волі, ён цалкам адмовіўся ад сябе, сваіх спраў і планаў, і прысвяціў жыццё рэалізацыі задум Бога.

Разважанню над сэнсам Божага Нараджэння прысвяціў катэхезу падчас агульнай аўдыенцыі 18 снежня Папа Францішак. Па словах Святога Айца, вельмі дарэчы ў апошнія дні Адвэнту задумацца над глыбінёй падзеі, якая перавярнула гісторыю чалавецтва.

Раніцай 17 снежня, у дзень свайго нараджэння, Святы Айцец Францішак цэлебраваў Імшу, на якую запрасіў персанал Дома св. Марты. Пантыфік адзначае 77-годдзе.

Пра радасць на шляху да Божага Нараджэння казаў перад малітвай “Анёл Панскі” 15 снежня Папа Францішак. Па словах Пантыфіка, крыніцай радасці для хрысціян застаецца Евангелле: менавіта яно дазваляе вызнаўцам Хрыста не баяцца і рухацца наперад, устаць і працягваць шлях.

На трывожную з’яву ў Касцёле — катэгорыю заўсёды незадаволеных хрысціян — звярнуў увагу 13 снежня падчас Імшы Папа Францішак. Па словах Пантыфіка, гэта тыя, хто баіцца адчыніць дзверы для Святога Духа - адсюль іх стан пастаяннага смутку.

Рыхтуючыся да святаў Божага Нараджэння, было б добра суцішыцца, каб паслухаць Бога, які прамаўляе з пяшчотай бацькі або маці, — аб гэтым казаў Папа Францішак падчас ранішняй Імшы 12 снежня.

Па словах Папы Францішка, калі добра ўгледзецца ў таямніцу Апошняга Суду, яна не можа не стаць “прычынай вялікага суцяшэння і даверу”. 11 снежня падчас агульнай аўдыенцыі на плошчы св. Пятра Пантыфік пачаў апошнюю серыю катэхез, прысвечаных Сімвалу веры, і патлумачыў, чым з’яўляецца Апошні Суд, які “амаль інстынктыўна нараджае ў нас пачуццё страху і, магчыма, нават трымцення”.

Пра тое, што не трэба баяцца суцяшэння Бога, – наадварот, трэба шукаць і прасіць яго, казаў Папа Францішак падчас Імшы 10 снежня ў капліцы Дома св. Марты. Каментуючы ўрывак з Кнігі Ісаі, Пантыфік звярнуў увагу, што Бог “прыходзіць да свайго народа, каб суцешыць яго”.

9 снежня Папа Францішак цэлебраваў ранішнюю Імшу разам з каталіцкім Патрыярхам Александрыі Ібрагімам Ісаакам Сідракам. У гаміліі Святы Айцец выказаў блізкасць хрысціянам Егіпта і чарговы раз звярнуўся з заклікам аб павазе да рэлігійнай свабоды ва ўсім блізкаўсходнім рэгіёне.

Мы былі выбраны Богам, каб жыць святым жыццём, свабодным ад граху, нагадаў Папа Францішак перад малітвай “Анёл Панскі” 8 снежня. Пантыфік заклікаў углядацца ў прыклад Найсвяцейшай Панны Марыі, “нашай Беззаганай і прыгожай Маці”, такім чынам распазнаючы “наш самы сапраўды лёс, самае глыбокае пакліканне: быць святымі і перамененымі любоўю”.

Маліцца з настойлівасцю і ўпэўненасцю ў тым, што Бог выслухае просьбы, заклікаў Папа Францішак падчас ранішняй Імшы 6 снежня. Паводле Пантыфіка, маліцца па-сапраўднаму — значыць не баяцца турбаваць Бога і мець “сляпы давер” да Яго.

“Калі Езус уваскрос, і мы таксама ўваскрэснем”, — нагадаў Папа Францішак падчас агульнай аўдыенцыі 4 снежня. Катэхезу Пантыфік прысвяціў уваскрасенню цела – “няпростай праўдзе”, якую дапамагае зразумець Святое Пісанне.

Касцёл павінен быць радасным, як Езус; менавіта радасць ён пакліканы перадаваць людзям — радасць, якая нясе сапраўдны спакой. Гэтаму прысвяціў гамілію падчас ранішняй Імшы 3 снежня Папа Францішак.

Да падрыхтоўкі да святаў Божага Нараджэння з малітвай, міласэрнасцю і адкрытым сэрцам заклікаў Святы Айцец 2 снежня падчас Эўхарыстыі ў капліцы Дома св. Марты. Па словах Папы, у дні Адвэнту пачынаецца новае падарожжа на сустрэчу з Панам, і менавіта ў гэтым сэнс Божага Нараджэння.