Фота Аўдыё Відэа  
be  ru  pl  en  de info@catholic.by
Гэта архіў старой версіі сайта. Новая версія знаходзіцца па адрасе catholic.by
Пантыфік у Грузіі: Бедныя і слабыя — гэта «цела Хрыста», якое ўсклікае да хрысціян усіх канфесій
Святы Айцец
01.10.2016 21:30

Дабрачынныя ініцыятывы з’яўляюцца спелым плодам Касцёла, які служыць, дае надзею і выяўляе міласэрнасць Бога, падкрэсліў Папа Францішак падчас сустрэчы з супрацоўнікамі дабрачынных структур Каталіцкага Касцёла ў Грузіі і асобамі, якім яны аказваюць дапамогу.

Сустрэча прайшла ў межах візіту Пантыфіка ў Грузію 1 кастрычніка на тэрыторыі тбіліскай паліклінікі «Redemptoris Hominis», якая належыць Ордэну рэгулярных клірыкаў служыцеляў хворых – айцам каміліянам. У сустрэчы прынялі ўдзел каля 700 чалавек.

Папа Францішак падзякаваў прадстаўнікам дабрачынных структур за іх працу і падкрэсліў яе экуменічнае вымярэнне. «Ваша дзейнасць – гэта шлях братэрскага супрацоўніцтва паміж хрысціянамі гэтай краіны і паміж вернікамі розных абрадаў. Гэтая сустрэча на знак евангельскай любові з’яўляецца сведчаннем адзінства і спрыяе шляху да еднасці. Заклікаю вас працягваць ісці гэтым патрабавальным і плённым шляхам: бедныя і слабыя – гэта “цела Хрыста”, якое ўсклікае да хрысціян усіх канфесій, падштурхоўваючы дзейнічаць без прыватных інтарэсаў, выключна адказваючы на імпульс Святога Духа», — сказаў Пантыфік.

Святы Айцец таксама прывітаў хворых, старых, пакутуючых і іншых людзей, якім дапамагаюць каталіцкія дабрачынныя структуры. «Мне радасна быць з вамі і падбадзёрыць вас: Бог вас не пакіне ніколі. Ён заўсёды будзе з вамі, з гатоўнасцю выслухаць, даць сілы ў моманты цяжкасцяў. Вы – умілаваныя Езуса, які пажадаў прыпадобніцца да церпячых, прыняўшы на сябе пакуты», — адзначыў Пантыфік.

На заканчэнне сустрэчы Папа ўдзяліў прысутным благаслаўленне і асабіста прывітаў кіраўнікоў дабрачынных структур Каталіцкага Касцёла ў Грузіі.

Паводле беларускай рэдакцыі Ватыканскага радыё

(AG)

 

Пры выкарыстанні матэрыялаў сайта спасылка на Catholic.By абавязкова.