Любоў заўсёды можа змяніць чалавека - гаворыцца ў пасланні, якое Папа Францішак перадаў вязням неапальскай турмы “Джузэпэ Савіо”, якую наведаў 21 сакавіка.
Каля ўваходу ў пэнітэнцыярную ўстанову сабраліся тысячы мясцовых жыхароў, якія віталі Святога Айца спевамі на неапалітанскім дыялекце. У турме Папа паразмаўляў са зняволенымі і з’еў з імі просты абед. Пантыфік запэўніў іх, што Бог не забывае пра сваіх дзяцей і ніколі іх не пакідае. Папа прызнаўся, што атрымлівае лісты з усяго свету ад людзей, якія адбываюць пакаранні за ўчыненыя злачынствы. “Я добра ведаю пра вашы сітуацыі”, - дадаў Святы Айцец.
“Вязні вельмі часта ўтрымліваюцца ва ўмовах, нягодных чалавечай асобы, і пасля не здольваюць вярнуцца ў грамадства. Але, дзякуй Богу, ёсць таксама кіраўнікі, капеланы, выхавацелі, душпастырскія працаўнікі, якія ведаюць, як вас падтрымліваць належным чынам. Існуюць добрыя і значныя прыклады вяртання да нармальнага жыцця”, - падкрэсліў Папа.
Святы Айцец заклікаў прыкладаць намаганні, каб спрыяць рэінтэграцыі зняволеных пасля адбывання пакарання і змене адносін да іх у грамадстве. “У аснове гэтай дзейнасці павінна знаходзіцца ўпэўненасць у тым, што любоў заўсёды можа змяніць чалавека”, - адзначыў Папа. Дзякуючы клопату пра зняволеных у турмах, па словах Пантыфіка, усё грамадства можа станавіцца больш справядлівым і ўважлівым да людзей.
Паводле беларускай рэдакцыі Ватыканскага радыё (AG)
|