Фота Аўдыё Відэа  
be  ru  pl  en  de info@catholic.by
Гэта архіў старой версіі сайта. Новая версія знаходзіцца па адрасе catholic.by
Папа ўзначаліў Імшу на тэрыторыі мемарыяльнага комплекса ў памяць ахвяр І Сусветнай вайны
Святы Айцец
13.09.2014 20:41

13 верасня 2014 г. Папа Францішак узначаліў святую Імшу на тэрыторыі мемарыяльнага комплекса, пабудаванага ў памяць аб ахвярах І Сусветнай вайны ў мястэчку Рэдзіпулья на поўначы Італіі. Падчас Імшы, успамінаючы пра загінуўшых ва ўсіх узброеных канфліктах, Святы Айцец адзначыў, што вайна – гэта шаленства планавальнікаў тэрору і гандляроў зброяй.

“У той час, як Бог вядзе наперад сваё стварэнне, і мы, людзі, пакліканы супрацоўнічаць у гэтай справе, вайна нясе разбурэнне. Разбурае ў тым ліку і самае цудоўнае, што было створана Богам: чалавека. Вайна знішчае ўсё, уключаючы сувязі паміж братамі. Вайна – гэта вар’яцтва; яе перспектыўны план – разбурэнне: яна хоча развівацца праз разбурэнне!” - сказаў Папа.

Пантыфік падкрэсліў, што каля вытокаў кожнага канфлікту стаіць адвечнае апраўданне Каіна: “Хіба я вартаўнік брата свайго?” “Прагавітасць, неталерантнасць, жаданне ўлады – гэта прычыны, якія стымулююць вайсковыя рашэнні, і яны часта апраўдваюцца ідэалогіяй; але на пачатку знаходзіцца апантанасць, скажоны імпульс. Ідэалогія – гэта апраўданне, і калі няма ідэалогіі, ёсць адказ Каіна: “Якая мне справа да майго брата?”: якая мне справа... “Хіба я вартаўнік брата свайго?” Вайна нікому ў твар не глядзіць: ні старым, ні дзецям, ні мамам, ні татам”, - адзначыў Святы Айцец.

Па словах Папы, над могілкамі ахвяраў вайны лунае дэвіз, які перагукваецца са словамі Каіна: “Якая мне справа?” “Усе гэтыя людзі, якія спачываюць тут, мелі свае мары, але іх жыцці былі змарнаваны. Чаму? Таму што чалавецтва сказала: “Якая мне справа”. Таксама і сёння, пасля другой паразы іншай сусветнай вайны, напэўна, можна казаць пра трэцюю вайну, якая вядзецца “па частках”, праз злачынствы, бойні, знішчэнні... Калі быць сумленнымі, то першыя старонкі газет павінны мець у якасці тытула словы: “Якая мне справа?” Каін сказаў бы: “Хіба я вартаўнік брата свайго?” – дадаў Пантыфік.

Святы Айцец нагадаў, што ад войнаў да сённяшняга дня працягвае гінуць вялікая колькасць людзей. “Чаму гэта магчыма? А таму, што таксама і сёння за кулісамі стаяць інтарэсы, геапалітычныя планы, прага грошай і ўлады, індустрыя ўзбраенняў, якая здаецца вельмі важнай! І гэтыя планавальнікі тэрору, арганізатары канфліктаў і гандляры зброяй напісалі ў сэрцы: “Якая мне справа?”” - сказаў Папа.

З абыякавасцю да лёсаў людзей, па словах Пантыфіка, “спекулянты на вайне”, магчыма, зарабляюць шмат, але іх сэрца страціла здольнасць плакаць. “Каін не плакаў. Не ўмеў плакаць. Цень Каіна накрывае нас сёння тут, на гэтых могілках. Яна бачна тут. Яна бачна ў гісторыі, якая працягваецца з 1914 г. да нашых дзён. І бачна таксама ў нашы дні. З сэрцам сына, брата, айца прашу ўсіх вас і за ўсіх нас аб навяртанні сэрца: перайсці ад словаў “якая мне справа” да плачу. За ўсіх паўшых у “бессэнсоўнай бойні”, за кожную ахвяру вар’яцтва вайны, усіх часоў”, - дадаў Папа, а таксама адзначыў, што сёння чалавецтва патрабуе плачу і зараз настаў час для слёз.

Паводле беларускай рэдакцыі Ватыканскага радыё

(AG)

 

Пры выкарыстанні матэрыялаў сайта спасылка на Catholic.By абавязкова.