Папа ўзначаліў Імшу пасхальнай вігіліі і ўдзяліў хрост беларусцы |
Святы Айцец |
20.04.2014 20:45 |
Вярнуцца, каб сустрэцца з Хрыстом, заклікаў Папа Францішак падчас літургіі пасхальнай вігіліі, якую ўзначаліў у базыліцы св. Пятра вечарам 19 красавіка 2014 г. Падчас яе Святы Айцец удзяліў сакрамэнт хросту дзесяці асобам, у тым ліку адной беларусцы Юліі Дземянчук. У гаміліі Пантыфік нагадаў, што ў апавяданні пра ўваскрасенне Пана двойчы узгадваецца заклік да неабходнасці вяртання ў Галілею – месца, дзе пачалася сустрэча Езуса з вучнямі. Да гэтага заклікаў анёл каля пустой магілы Хрыста, а таксама сам уваскрослы Збаўца. “Вярнуцца ў Галілею азначае перачытаць усё, пачынаючы ад крыжа і перамогі. Перачытаць усё – прапаведванне, цуды, новую супольнасць, энтузіязм і невыкананне абавязкаў, аж да здрады – перачытаць усё, пачынаючы ад канца, які ёсць новым пачаткам, ад гэтага найвышэйшага акту любові”, - заклікаў Папа. Паводле беларускай рэдакцыі Ватыканскага радыё (AG) |