Пацыенты ватыканскай дзіцячай клінікі “Bambino Gesu” атрымалі салодкія падарункі ад Святога Айца Францішка з нагоды велікодных святаў. Папа перадаў для іх 150 шакаладных яек, якія з’яўляюцца традыцыйным велікодным ласункам у Італіі.

Папа наведваў клініку “Bambino Gesu” напярэдадні Божага Нараджэння ў 2013 г. Той візіт многія журналісты называлі “самым кранальным” за час яго Пантыфікату. Святы Айцец правёў у шпіталі амаль тры гадзіны, сустракаючыся з дзецьмі, якія там праходзяць лячэнне, іх сем’ямі і медыцынскім персаналам.

Педыятрычны шпіталь “Bambino Gesu” з’яўляецца ўласнасцю Апостальскай Сталіцы. Ён лічыцца адной з найлепшых дзіцячых бальніц Італіі. Першым Пантыфікам, які наведаў яго, быў Ян ХХІІІ, які пабываў там у 1958 г. Павел VI, Ян Павел ІІ і Бэнэдыкт XVI таксама наведвалі шпіталь.

Паводле беларускай рэдакцыі Ватыканскага радыё

(AG)