Зачытаны духоўны тэстамэнт Папы Рымскага і вызначана дата пачатку Канклаву
06.04.2005 03:00
6 красавіка 2005 г., на агульным сходзе Калегіі Кардыналаў быў зачытаны духоўны тэстамэнт Папы Рымскага Яна Паўла ІІ, а таксама вызначана дата пачатку Канклаву. Кардыналы, якія маюць права голасу (усяго 117 асобаў), збяруцца на Канклаў 18 красавіка, каб абраць новага наступніка святога Пятра.
Хрысціяне прычыняюцца да пабудовы дэмакратычнага Ірака
02.11.2004 03:00
4 лістапада Святы Айцец Ян Павел II сустрэўся з прэм’ер-міністрам Іраку Аядам Алаві. «Я шчаслівы вітаць Вас у Ватыкане і запэўніваю Вас ў маёй нязменнай блізкасці да іракскага народу, які знёс столькі трагічных пакутаў у апошнія часы», - сказаў Папа падчас аўдыенцыі. Ён запэўніў аб падтрымцы намаганняў іракскага народу на шляху стварэння дэмакратычных інстытутаў, якія будуць забяспечваць абарону правоў усіх грамадзянаў краіны незалежна ад іх этнічнай і рэлігійнай прыналежнасці.»Я упэўнены, што хрысціянская супольнасць, прысутная ў Іраку з апосталькіх часоў, зробіць свой уклад ва ўзрастанне дэмакратыі і пабудову мірнай будучыні ў рэгіёне», - дадаў Ян Павел ІІ.
Мільярды людзей у свеце назіралі за ўрачыстай цырымоніяй пахавання Яна Паўла ІІ на тэлебімах і па тэлебачанні. У святынях розных веравызнанняў праходзілі жалобныя набажэнствы.
У больш за 400 беларускіх касцёлах адначасова з пачаткам пахавальнай урачыстасці ў Ватыкане на працягу паўгадзіны званілі званы.
Труну з целам Яна Паўла ІІ апоўдні 8 красавіка паклалі ў крыпту базылікі св. Пятра, у якой да 2000 г. знаходзілася грабніца Яна ХХІІІ, перанесеная ў базыліку пасля яго беатыфікацыі. Згодна з апошняй воляй, выказанай у тэстамэнце, Ян Павел ІІ спачыў у зямлі, без саркафага.
4 сакавіка, у дзень святога Казіміра, Яго Эмінэнцыя кардынал Казімір Свёнтэк адзначаў імяніны. З гэтай нагоды віншаванні даслалі Святы Айцец Ян Павел ІІ, дзяржаўны сакратар Апостальскай Сталіцы кардынал Анджэло Садана, а таксама яго намеснік Леанардо Сандры.
8 снежня споўнілася 150 гадоў з дня абвяшчэння Папам Піем ІХ догмату Беззаганнага Зачацця Найсвяцейшай Панны Марыі. Як і штогод, ад імя Святога Айца і ў ягонай прысутнасці калона Беззаганнай Найсвяцейшай Панны Марыі на плошчы Іспаніі ў Рыме была ўпрыгожана вянком, які правісіць на статуі да наступнага свята. 
У суботу 27 лістапада ў базыліцы святога Пятра адбылася цырымонія перадачы праваслаўнай Царкве рэліквіяў святых біскупаў і дактароў Касцёла Яна Залатавуснага і Грыгорыя Назіянскага (Багаслова). 
«Сапраўдны экуменізм не магчымы без унутранага навяртання і ачышчэння памяці, без святасці жыцця ў адпаведнасці з Евангеллем, і перадусім без трывалай і нястомнай малітвы, якая рэхам адгукаецца на малітву Езуса». З такімі словамі Святы Айцец звярнуўся 13 лістапада да ўдзельнікаў урачыстых Нешпараў, якія адбыліся ў Ватыканскай базыліцы з нагоды 40-й гадавіны абвяшчэння дэкрэту ІІ Ватыканскага Сабора «Unitatis Redintegratio» («Аб экуменізме»).
Ватыканскае радыё