У эпоху сацыяльных сетак, якая характарызуецца хуткасцю, важна, каб Зала Друку паведамляла навіны не толькі ясна і дакладна, але і як мага хутчэй.
Пра гэта на сустрэчы з удзельнікамі міжнароднага семінара для прафесійных журналістаў, арганізаванага Папскім універсітэтам Святога Крыжа, 7 верасня распавёў кіраўнік Залы Друку Апостальскай Сталіцы Грэг Бёрк.
Як паведамляе беларуская рэдакцыя Ватыканскага радыё, Грэг Бёрк падкрэсліў, што прысутнасць Папы ў сацыяльных сетках з’яўляецца важным знакам жадання Касцёла дасягнуць усіх людзей і дзе гэта толькі магчыма. Паводле яго слоў, менавіта да гэтага Пантыфік падштурхоўвае ватыканскія СМІ.
Прэс-сакратар Апостальскай Сталіцы адзначыў, што галоўная мэта рэформаў ватыканскіх СМІ заключаецца ва ўмацаванні голасу Папы і Касцёла. Для гэтага трэба быць адкрытымі на новае і пераадолeць спакусу жыцця паводле прынцыпу «заўсёды так рабілася». Грэг Бёрк нагадаў, што працэс рэформы патрабуе часу, і з аптымізмам заўважыў, што ў ватыканскіх СМІ ёсць мноства таленавітых людзей.
Адказваючы на пытанні журналістаў, Грэг Бёрк распавёў, што вера — гэта фундаментальны элемент для яго. Журналіст выказаў захапленне працай свайго папярэдніка на гэтай пасадзе а. Фэдэрыко Ламбардзі, які менавіта ў веры знаходзіў спакой, неабходны ў моманты самых цяжкіх выпрабаванняў.
Міжнародны семінар для прафесійных журналістаў праходзіць у Папскім універсітэце Святога Крыжа 5-11 верасня. Ён пакліканы дапамагчы прадстаўнікам СМІ больш кампетэнтна апавядаць пра тэмы, звязаныя з жыццём Касцёла і Ватыкана. У форуме прымаюць удзел 40 чалавек з 18 краін.
56-гадовы Грэг Бёрк, які нарадзіўся ў ЗША, працуе ў структурах Святога Пасаду з 2012 г., калі быў прызначаны кансультантам па пытаннях камунікацыі ў секцыі па агульных пытаннях Дзяржаўнага Сакратарыяту. З 21 снежня 2015 г. быў віцэ-дырэктарам Залы Друку Святога Пасаду. Валодае англійскай, італьянскай, іспанскай і французскай мовамі. Кіраўніком Залы Друку Папа Францішак прызначыў яго 11 ліпеня гг.