6 верасня папа Францішак прыняў на аўдыенцыі прэзідэнта ватыканскага педыятрычнага шпіталя «Дзіцятка Езуса» Марыэлу Энок. Сустрэча прайшла ў Доме св. Марты — цяперашняй рэзідэнтыі Папы. Святы Айцец з цікавасцю выслухаў сваю суразмоўцу і пажадаў, каб бальніца ўсё больш станавілася «вялікай справай міласэрнасці».

Падчас аўдыенцыі Марыэла Энок пазнаёміла Пантыфіка з дэталямі супрацоўніцтва, якое ватыканская педыятрычная бальніца ажыццяўляе з аналагічнай медыцынскай структурай у Бангі, сталіцы Цэнтральна-Афрыканскай Рэспублікі. Дадзеную медыцынскую ўстанову Папа Францішак наведваў падчас свайго мінулагодняга візіту ў гэту краіну.

Падчас аўдыенцыі Пантыфік меў магчымасць пазнаёміцца з дасягненнямі шпіталя «Дзіцятка Езуса» ў навуковай сферы і лячэнні дзяцей, у тым ліку тых, якія прыбываюць з замежжа.

Напрыканцы сустрэчы Марыэла Энок наведала педыятрычны дыспансер св. Марты ў Ватыкане і перадала ў дар гэтай дабрачыннай структуры новы ультрагукавы апарат.

Папа Францішак сустракаўся з Марыэлай Энок упершыню з моманту яе прызначэння старшынёй кіраўнічай рады шпіталя «Дзіцятка Езуса» ў лютым 2015 г.

Святы Айцец на спецыяльнай аўдыенцыі 15 снежня 2016 г. прыме ўсіх супрацоўнікаў гэтай структуры.
Шпіталь «Дзіцятка Езуса» быў заснаваны ў 1869 г. для лячэння бедных дзяцей у Рыме. Гэта была першая дзіцячая клініка ў Італіі. У 1924 г. яна была перададзена пад кіраўніцтва Святога Пасаду і ў цяперашні час знаходзіцца пад асабістым патранатам Папы. Бальніца з’яўляецца вядучай педыятрычнай установай Італіі і адным з лепшых цэнтраў дзіцячай транспланталогіі ў Еўропе.

Паводле беларускай рэдакцыі Ватыканскага радыё
(VGr)