Фота Аўдыё Відэа  
be  ru  pl  en  de info@catholic.by
Гэта архіў старой версіі сайта. Новая версія знаходзіцца па адрасе catholic.by
Папа на пенсіі Бэнэдыкт XVI распавёў аб прычыне сыходу з пасады Біскупа Рыма
Дзяржава Ватыкан
24.08.2016 15:19

Папа на пенсіі Бэнэтыкт XVI у інтэрв’ю італьянскай газеце «La Repubblica» распавёў аб прычынах свайго адмаўлення ад пасады Біскупа Рыма, а таксама пра сардэчныя і сяброўскія адносіны з Папам Францішкам.

Паводле слоў Пантыфіка на пенсіі, нягледзячы на жаданне «давесці да канца Год веры» і скончыць чарговую энцыкліку, ён адчуваў сябе вельмі стомленым.

Акрамя таго, былі запланаваны Сусветныя дні моладзі ў Рыа-дэ-Жанейра, на якіх, «паводле ўстаноўкі Яна Паўла ІІ, фізічная прысутнасць Папы была неад’емнай».

Абмежаванасць сіл

«Пасля падарожжа ў Мексіку і на Кубу я больш не адчуваў сябе ў стане здзейсніць настолькі складанае падарожжа», — прызнаўся Папа на пенсіі і дадаў, што менавіта тады, у сакавіку 2012 г., моцна адчуў абмежаванасць сваіх фізічных сіл.

«Перш за ўсё я зразумеў, што больш не ў стане пераносіць трансатлантычныя пералёты па прычыне змены часавых паясоў. Канешне, я размаўляў аб гэтых праблемах з маім урачом, прафесарам Патрыцыё Паліска. Такім чынам, станавілася ясна, што я больш не буду ў стане браць удзел у Сусветных днях моладзі ў Рыа-дэ-Жанейра летам 2013 г., бо гэтаму перашкаджала праблема часавых паясоў. Ад таго часу я павінен быў у адносна кароткі тэрмін прыняць рашэнне аб даце майго сыходу», — распавёў Бэнэдыкт XVI.

Сённяшні Пантыфік на пенсіі быў упэўнены, што без яго прысутнасці «Год веры пройдзе добра». «Я меў моцнае перакананне, што мой наступнік, як і адбылося пазней, зможа аднолькава добра давесці да канца пажаданую Панам ініцыятыву, якую пачаў я», — сказаў Бэнэдыкт XVI.

Папа Бэнэдыкт XVI і Папа Францішак

Каментуючы выбар кляштара «Mater Ecclesiae» у якасці сваёй рэзідэнцыі, Бэнэдыкт XVI спаслаўся на жаданне Яна Паўла ІІ, паводле якога гэтае месца павінна было быць месцам малітвы, «як крыніца жывой вады ў Ватыкане».

Таму ў ім па чарзе пражывалі прадстаўніцы розных кляўзуровых жаночых манаскіх супольнасцяў. У 2012 г. манахіні пакінулі кляштар па прычыне яго рамонту. Тады Бэнэдыкт XVI вырашыў заняць іх месца і адсюль працягваць служыць Касцёлу малітвай.

Папа на пенсіі распавёў, што акрамя падтрымкі, якую адчуваў ад Езуса, Маці Божай і святых спадарожнікаў яго жыцця – св. Аўгустына, св. Банавентуры, св. Бэнэдыкта і св. Францішка, — вельмі важнай была падтрымка людзей, ад якіх ён атрымліваў вялікае мноства лістоў з добрымі словамі і абяцаннямі малітвы.

Гаворачы пра адносіны з Папам Францішкам, Бэнэдыкт XVI заўважыў, што яго паслухмянасць «ніколі не ставілася пад пытанне».

Акрамя гэтага, іх злучае моцнае сяброўства. «У момант яго абрання, як і многія іншыя, я адчуў спантаннае пачуццё ўдзячнасці да Божага Провіду. Пасля двух Пантыфікаў з Цэнтральнай Еўропы Пан, калі так можна сказаць, скіраваў позірк на Паўсюдны Касцёл і заклікаў нас да больш шырокай еднасці, больш каталіцкай», — адзначыў Пантыфік на пенсіі.

Бэнэдыкт XVI назваў асабістыя адносіны з Папам Францішкам «бацькоўска-братэрскімі». Паводле яго слоў, цяперашні Папа часта дасылае яму маленькія падарункі, асабістыя лісты і наведвае перад падарожжамі.

Бэнэдыкт XVI завяршыў служэнне на пасадзе Біскупа Рыма 28 лютага 2013 г. Папа Францішак стаў яго наступнікам 13 сакавіка 2013 г.

Паводле беларускай рэдакцыі Ватыканскага радыё, (IL)

 

Пры выкарыстанні матэрыялаў сайта спасылка на Catholic.By абавязкова.