У 2015 г. адкрые свае дзверы для турыстаў ферма, размешчаная ў летняй рэзідэнцыі Пантыфіка ў Кастэль Гандольфа. Менавіта з яе прывозяць малочныя прадукты, мяса і гародніну для кухні ў Доме св. Марты, дзе жыве Папа Францішак.

Ферма з’яўляецца часткай рэзідэнцыі, якая займае плошчу 55 гектараў, і, такім чынам, большая за Ватыкан, які месціцца на 44 гектарах. Магчыма, наведванне папскай гаспадаркі будзе спалучана з дэгустацыяй мясцовых прадуктаў.

У Ватыкане вырашылі адкрыць ферму для публікі пасля поспеху экскурсій у сады папскай летняй рэзідэнцыі, якія пачаліся ў сакавіку 2014 г. Гэта было асабістае жаданне Папы Францішка. З таго часу тут пабывалі 8 тыс. асоб.

Ферма была пабудавана ў 1930-ых гадах па просьбе папы Пія XI і дзейнічае ў адпаведнасці з прынцыпамі вядзення сельскай гаспадаркі і жывёлагадоўлі тых часоў. Выкарыстоўваюцца толькі арганічныя ўгнаенні. Да хімічных прадуктаў звяртаюцца толькі, калі гэта сапраўды неабходна.

У цяперашні час на ферме працуе восем чалавек, якія займаюцца жывёламі і садам, дзе расце бульба, кабачкі, памідоры і іншая гародніна.