Фота Аўдыё Відэа  
be  ru  pl  en  de info@catholic.by
Імша Хрызма ў Віцебску: святарства па сваёй прыродзе рэалізоўваецца ў духу служэння і ахвяры (+фотарэпартаж)
Беларусь - Віцебская дыяцэзія
13.04.2017 17:49

13 красавіка, у Вялікі чацвер, у катэдральным касцёле Езуса Міласэрнага ў Віцебску святары Віцебскай дыяцэзіі разам са сваім ардынарыем біскупам Алегам Буткевічам канцэлебравалі св. Імшу Хрызма.

Гэтая Імша як асаблівая маніфестацыя адзінства Касцёла ўказвае на паўнату святарскай улады біскупа і адзінства з ім святароў дыяцэзіі.

У гаміліі біскуп Віцебскі нагадаў, што ў Вялікі чацвер святкуецца ўстанаўленне сакрамэнтаў Эўхарыстыі і святарства, пры гэтым іерарх адзначыў, што «не існуе ў свеце больш узнёслага і больш адказнага задання, чым дапамагаць чалавеку дасягнуць вечнага жыцця».

Разважаючы пра сутнасць сакрамэнту святарства, біскуп звярнуўся да святароў: «Мы павінны як мага часцей задаваць сабе гэтае пытанне: “Ці сапраўды праз мяне дзейнічае Бог?” У кожную хвіліну, не толькі калі стаю пры алтары і праз мае рукі здзяйсняецца Найсвяцейшая Ахвяра, але і ў размове, праз мае паводзіны і знешні выгляд».

«Будучы свецкім, можна адначасова жыць у небе Любові, а жывучы ў манастве ці святарстве, трываць у пекле абыякавасці і самалюбства»

Сярод іншага біскуп Віцебскі працытаваў урывак з духоўнага дзённіка Аліцыі Лянчэўскай, якая адышла ў вечнасць 5 студзеня 2012 г. у Шчэціне. У прыватным аб’яўленні да гэтай сучаснай містычкі Езус казаў: «Фундаментам паклікання павінна быць гарачая любоў да Бога. Ідучы за голасам паклікання, не трэба спадзявацца ані прагнуць больш лёгкага жыцця, меншага цярпення і працы, чым у свецкім жыцці, псіхічнага ці фізічнага камфорту...

Свет не з’яўляецца пеклам, а жыццё ў святарстве або законе не ёсць небам. Неба або пекла чалавек носіць у сваім сэрцы: неба, калі душа яго акунутая ўва Мне; пекла, калі жыве паводле правілаў, навязаных светам... І можна, будучы свецкім чалавекам, жыць адначасова ў небе Любові, або, жывучы ў манастве ці святарстве, трываць у пекле абыякавасці і самалюбства».

Нагадваючы, што «святарства па сваёй прыродзе заўсёды павінна рэалізоўвацца ў духу служэння і ахвяры», біскуп Віцебскі адзначыў, што адным з лепшых прыкладаў служэння з’яўляецца вобраз св. Яна Віянэя.

«Нягледзячы на стомленасць, ён гадзінамі служыў у канфесіянале, а часам усю ноч пісаў казанні. Ён шмат выцерпеў ад людскіх языкоў, не кажучы ўжо пра змаганне са злым духам. І разам з тым ён ведаў, што збаўленню большай колькасці душ лепш прычыніцца ахвяра і цярпенне, чым палымяныя казанні».

Напрыканцы гаміліі біскуп Віцебскі пажадаў святарам, каб, «нягледзячы на розныя выпрабаванні, маглі адчуваць тую вялікую радасць, якая плыве з атрыманага намі паклікання, і заставаліся вернымі Яму, добра спаўняючы сваю місію».

Падчас Імшы Хрызма біскуп Віцебскі Алег Буткевіч благаславіў алей хворых і хрызма.

Асаблівым момантам Імшы Хрызма, якая з’яўляецца адным са знакаў адзінства святароў са сваім біскупам, было аднаўленне абяцанняў, дадзеных падчас прэзбітэрскага пасвячэння.


Кацярына Лаўрыненка

Фота Аляксандры Шчыглінскай

Фотарэпартаж
 

Пры выкарыстанні матэрыялаў сайта спасылка на Catholic.By абавязкова.

Беларусь - Віцебская дыяцэзія

16.05 15:41У новых «Падарожжах дылетанта» — маляўнічыя Відзы і адзін з самых высокіх касцёлаў Беларусі
15.05 17:06Апостальскі Нунцый Габар Пінтэр наведаў каталіцкія парафіі ў Віцебску
13.05 21:26Апостальскі Нунцый у санктуарыі Маці Божай у Шуміліне: «Кожны з нас абраны для асаблівай місіі у сем’ях, Касцёле і грамадстве» (+фотарэпартаж)
10.05 12:23«Бог не хацеў, каб чалавек ведаў пра зло»: рэкалекцыйны курс на тэму духоўнай барацьбы прайшоў у Оршы
04.05 08:54У Росіцы прайшла сустрэча сем’яў
25.04 12:49У Віцебскай дыяцэзіі будзе рэалізаваны праект «Віцебскі арганны шлях»
24.04 18:27Пра ролю Беларусі ў распаўсюджванні Божай Міласэрнасці разважалі ў катэдры ў Віцебску
17.04 11:40Біскуп Буткевіч падчас рэзурэкцыі: у нашым свеце трэба быць моцна перакананымі ў існаванні Уваскрослага Збаўцы
17.04 09:54Біскуп Віцебскі Алег Буткевіч: магіла Езуса стала кропкай адліку новага жыцця
13.04 17:49Імша Хрызма ў Віцебску: святарства па сваёй прыродзе рэалізоўваецца ў духу служэння і ахвяры (+фотарэпартаж)