З нагоды cвятаў Божага Нараджэння і Новага года святары катэдральнай парафіі ў Віцебску наведалі Абласны клінічны шпіталь і Дзіцячы абласны клінічны шпіталь, дзе сустрэліся з маленькімі пацыентамі.
Ксёндз Андрэй Аніскевіч і ксёндз Генадзь Рэйшэль прывезлі з сабой падарункі і павіншавалі дзяцей з каляднымі і навагоднімі святамі. Для хворых дзяцей, якія не змаглі з-за хваробы быць дома на святы, гэта была цудоўная магчымасць перажыць святочны настрой і атрымаць падарункі.
Некаторыя дзеткі заспявалі песні і прачыталі вершы. На хвіліну аддзяленні шпіталяў ператварыліся ў імправізаваныя сцэны.
Пробашч віцебскай катэдры кс. Андрэй Аніскевіч зазначыў: «Для мяне гэта асаблівая радасць, калі я магу хоць крыху аблегчыць стан гэтых хворых дзетак. Дай Бог ім усім хутчэйшага выздараўлення і вяртання дадому».
Падарункі для дзяцей з віцебскіх шпіталяў былі падрыхтаваныя дабрачыннай каталіцкай арганізацыяй «Карытас».