З восені мінулага года ў Друі з’явіўся ансамбль, у склад якога ўвайшлі наймалодшыя жыхары мястэчка. Дзеці, якія вучацца ў першым і другім класах мясцовай сярэдняй школы, пад кіраўніцтвам педагога Валянціны Казакевіч, пачалі займацца музыкай на класічных інструментах: скрыпках, гітарах і кантрабасе.

Гэта стала часткова магчымым дзякуючы Пасольству Польшчы ў Мінску, супрацоўнікі якога прывезлі і падарылі дзецям скрыпкі. Большасць удзельнікаў ансамбля - выхаванцы мясцовага дзіцячага дома.

Унікальнасць ансабля ў тым, што юныя музыкі рэгулярна ўключаюцца ў нядзельную літургію, разам з арганам суправаджаюць касцёльны спеў вернікаў.

Перад парафіяльнай урачыстасцю Найсвяцейшай Тройцы ансабль прыехалі паслухаць паслы і госці з Польшчы, а таксама прадстаўнікі раённай улады. Госці Друі засталіся задаволенымі з вынікаў аднаго года навучання дзяцей, насалодзіліся класічнай музыкай маленькіх артыстаў, якая гучыць і ў сценах святыні.

Кс. Сяргей Сурыновіч (АлГ)