Фестываль калядных песень «Зорка Бэтлеема» ў дзесяты раз сабраў парафіяльныя музычныя гурты Віцебскай дыяцэзіі ў Мёрах. Урачыстасць распачалася святой Імшой у мёрскім касцёле.

Юбілейны фестываль адзначаўся высокім узроўнем яго ўдзельнікаў. Сярод іх былі музычныя гурты, прагучала шмат сольных выкананняў, інструментальная музыка, вакальнае шматгалоссе. У калядных кампазіцыях каталіцкіх гуртоў Віцебшчыны адчувалася зладжанае і захапляльнае выканне. Юныя артысты выконвалі беларускія сучасныя і народныя песні, спевы замежных аўтараў. Гучала шмат аўтарскіх песен, якія былі выкананы ўпершыню на святочнай сцэне раённага Дома культуры.

Адчувалася, што фестываль, які мае ўжо шмат традыцый і прыхільнікаў, арганізаваны на высокім узроўні. Завіталі на яго і прадстаўнікі шматлікіх парафій, каб на наступны год прыехаць у Мёры са сваімі праграмамі.

Кожнаму выступленню парафіяльных гуртоў папярэднічае вялікая праца музычных кіраўнікоў і духоўных асобаў. Радасна, што на Віцебшчыне гэтая праца актыўна вядзецца ў парафіяльных супольнасцях, увянчаннем чаго і стаў фестываль «Зорка Бэтлеема».

Пераможцам юбілейнага фестывалю стаў квартэт хлапчукоў з Мёраў. Напэўна, справядліва, што мясцовы калектыў зрабіў сабе такі падарунак на юбілей. А перамога была заслужанай: пра гэта сведчыў і ўзровень выкананння, і ўменне трымацца на сцэне, і сам спеў. Усё гэта з’яўляецца прыкладам для іншых, узорам да чаго трэба імкнуцца, як працаваць і славіць Бога сваім спевам.

Благаслаўляючы ўдзельнікаў фестывалю на дарогу, мёрскі пробашч Кшыштаф Мянкіна запрасіў на наступны год ізноў прыехаць на фестываль, бо гэтая ўрачыстасць у першую чаргу не конкурс, а радаснае праслаўленне, меладычныя праменчыкі зоркі на хвалу Дзіцяці.

Кс. Сяргей Сурыновіч