27-28 жніўня ў Міждыяцэзіяльнай вышэйшай духоўнай семінарыі імя св. Тамаша Аквінскага ў Пінску адбылася малітоўная сустрэча святароў-выпускнікоў Вышэйшай духоўнай семінарыі ў Гродне, якія сёлета адзначаюць 12-ю гадавіну святарскага служэння.

Існуе прыгожая традыцыя, што святары, якія разам прайшлі шлях шасці гадоў вучобы і фармавання на адным курсе духоўнай семінарыі, штогод збіраюцца на сумесную сустрэчу. «Такія дні сумеснай малітвы і дзялення святарскім досведам вельмі важныя для кожнай духоўнай асобы, – распавядае адзін з удзельнікаў сёлетняй сустрэчы ксёндз Антоні Казлоўскі, пробашч парафіі ў Вішневе. – Гэта ўнікальная магчымасць для кожнага з нас падзяліцца сваімі думкамі, перажываннямі, радасцямі і клопатамі святарскага служэння. Мы разам прайшлі шасцігадовы шлях падрыхтоўкі да святарства. Добра ведаем адзін аднаго. Такія штогадовыя сустрэчы дапамагаюць нам адчуць адзінства, падтрымку брата па святарстве, у чымсьці параіцца, памаліцца, нанова адкрыць для сябе каштоўнасць нашага служэння».

Сёлетняя сустрэча ў Пінску была не выпадковай. Па-першае, у гэтым горадзе нясе сваё святарскае служэнне адзін з прадстаўнікоў групы – кс. Андрэй Рылка. Яму прыпаў гонар быць чарговым арганізатарам штогадовага з’езду аднакурснікаў. Існуе прыгожы звычай, што святары штогод па чарзе збіраюцца ў парафіях, дзе служыць кожны з іх супольнасці. Гэта дапамагае пазнаёміцца з рэаліямі служэння кожнага душпастыра.

Не менш важнай нагодай сёлетняй сустрэчы сталі круглыя гадавіны, якія перажывае Пінская дыяцэзія. Гэта 90-годдзе заснавання дыяцэзіі і духоўнай семінарыі ў Пінску. Таксама Касцёл на Палессі ўзгадвае 145-ю гадавіну нараджэння першага біскупа Пінскага – Слугі Божага Зыгмунта Лазінскага.

Цэнтральным момантам сустрэчы святароў, выпускнікоў 2003 года, стала святая Імша ў пінскай катэдральнай базыліцы Унебаўзяцця Найсвяцейшай Панны Марыі, якую ўзначаліў біскуп Пінскі Антоні Дзям’янка. У часы навучання сабраных святароў у гродзенскай семінарыі біскуп Антоні быў рэктарам гэтай духоўнай установы. У гаміліі арцыпастыр заклікаў святароў быць вернымі і адважнымі ў сваім служэнні, не баяцца выклікаў часу, але шукаць сілы і мудрасці ў руплівым малітоўным кантакце з Богам. А прысутных на Імшы вернікаў біскуп заклікаў маліцца за святароў і аб новых пакліканнях да святарскага і манаскага служэння. На заканчэнне літургіі пінскі ардынарый паімённа прадставіў вернікам кожнага з чатырнаццаці сабраных святароў, тым самым паказваючы, што добра ведае сваіх выхаванцаў і падтрымлівае іх на шляху святарскага служэння, нягледзячы на тое, што яны працуюць у самых розных і аддаленых кутках Беларусі.

Шчымлівым момантам сустрэчы была і засяроджаная малітва святароў на чале з біскупам Антоніем каля труны Слугі Божага Зыгмунта Лазінскага. Сабраныя давяралі Богу свае інтэнцыі і маліліся аб хутчэйшай беатыфікацыі першага арцыпастыра Пінскай дыяцэзіі. Пасля гэтага святары з удзячнай малітвай наведалі крыпту, дзе пахаваны сведка веры кардынал Казімір Свёнтэк.

На заканчэнне з’езду сабраныя пазнаёміліся з актуальным душпастырствам у Пінску. Між іншым яны наведалі будаўнічую пляцоўку, дзе імклівымі тэмпамі ўзносіцца касцёл св. Бэнэдыкта, будаваны намаганнямі новай парафіі на чале з яе пробашчам кс. Андрэем Рылкам.

Развітваючыся з Пінскам, святары яшчэ раз адзначылі неабходнасць штогадовых сустрэч, якія даюць магчымасць разам дзякаваць Богу за дар святарства і адкрываць гэты дар кожны раз нанова.

(AG)

Фота кс. Яўгена Барысюка