З нагоды 1150-годдзя з часу заснавання Полацка, якое будзе адзначацца ў 2012 г., выданне Беларускага Экзархата плануе перавесці ў лічбавы фармат Полацкае Евангелле, перапісанае ў ХІІ ст., хутчэй за ўсё, святой Еўфрасінняй Полацкай. Супрацоўнікі выдавецтва збіраюцца распачаць працу ў лютым 2010 г.

Як паведамілі ў прэс-службе Беларускага Экзархата інфармацыйнаму агенцтву «Интерфакс», перавод Евангелля ў лічбавы фармат адбудзецца ў Расійскай нацыянальнай бібліятэцы. Гэтую працу расцэньваюць як «важнейшы этап падрыхтоўкі факсімільнага выдання Полацкага Евангелля».

Рукапіс Евангелля напісаны на пергаменце і ўпрыгожаны арнаментаванымі ініцыяламі старавізантыйскага тыпу. Большая частка манускрыпта, як паведамілі ў Экзархаце, захоўваецца ў Расійскай нацыянальнай бібліятэцы ў Санкт-Пецярбургу, астатняя частка захоўваецца ў Маскве.