Фота Аўдыё Відэа  
be  ru  pl  en  de info@catholic.by
У Мінску Мітрапаліт Кандрусевіч памаліўся з прадстаўнікамі літоўскай дыяспары
Беларусь - Мінска-Магілёўская архідыяцэзія
09.03.2017 20:13

9 сакавіка ў мінскім касцёле свв. Сымона і Алены Мітрапаліт Тадэвуш Кандрусевіч цэлебраваў св. Імшу для Мінскай літоўскай дыяспары. Нагодай для сустрэчы стаў успамін апекуна Літвы — святога Казіміра. У Каталіцкім Касцёле літургічны ўспамін святога каралевіча прыпадае на 4 сакавіка.

У гаміліі іерарх падкрэсліў, што святога Казіміра можна лічыць апекуном трох народаў, не толькі літоўскага, але таксама беларускага і польскага. Казімір нарадзіўся ў каралеўскай сям’і ў Кракаве, жыў у Вільні, а памёр у гродзенскім замку. Яго імя вельмі папулярнае ў гэтых трох краінах. Таксама св. Казімір з’яўляецца галоўным апекуном Панявежскай дыяцэзіі ў Літве і другім апекуном Гродзенскай дыяцэзіі і Беластоцкай архідыяцэзіі ў Польшчы.

«Літургічны ўспамін св. Казіміра прыпадае на Вялікі пост, і гэта сімвалічна, бо яго жыццё вельмі адпавядае духу гэтага часу. Як вядома, Вялікі пост засяроджвае ўвагу вернікаў на малітве, посце і міласціне. На гэтых трох справах святы Казімір будаваў сваё жыццё. Ён быў чалавекам малітвы, а асабліва адзначаўся пашанай да Найсвяцейшага Сакрамэнту і Найсвяцейшай Панны Марыі.

Яго часта можна было бачыць ноччу на малітве перад зачыненымі дзвярыма віленскай катэдры. Ён напісаў гімн у гонар Божай Маці. А незадоўга да сваёй смерці падчас Імшы ў капліцы гродзенскага замка, калі чыталася Евангелле, хацеў устаць. Яму было цяжка, і прысутныя настойвалі, каб ён не ўставаў. Ён, аднак, адказаў, што не можа сядзець, калі яго Бог прамаўляе. Гэта навука для нас, людзей XXI стагоддзя, калі мы “сядзім” і не звяртаем увагі на Божы закон, жывём не паводле Божага, а паводле свайго закону», — адзначыў Мітрапаліт Тадэвуш.

Святы Казімір адзначаўся аскетычным стылем жыцця, хоць і меў слабое здароўе. Маральныя нормы пры каралеўскім двары захоўваліся далёка не заўсёды. «Яму казалі: бяры ад жыцця ўсё, бо толькі раз жывеш. Ён жа адказваў: лепш памерці, чым зграшыць. Мы таксама павінны браць з яго прыклад і не паддавацца спакусам, а жыць згодна з Божым законам», — заклікаў іерарх.

Святы Казімір, як нагадаў арцыпастыр, таксама апекаваўся беднымі і быў адкрыты да кожнага, хто да яго звяртаўся. «Сярод нас мноства бедных, якім патрэбна як матэрыяльная, так і духоўная апека, і мы павінны ім дапамагаць», — падкрэсліў Мітрапаліт Кандрусевіч.

«Пасля Другой сусветнай вайны віленская катэдра была канфіскавана, і ў ёй знаходзіўся музей. Тады рэліквіі св. Казіміра былі перавезены ў касцёл свв. апосталаў Пятра і Паўла. Іх дасталі з сярэбранага саркафага і на аўтамабілі “Пабеда” перавезлі на новае месца. Гэта было нібы выгнанне святога. Атэісты, напэўна, святкавалі перамогу. Аднак Бог паказаў, што гэта была пірава перамога. На свята св. Казіміра ў 1989 годзе рэліквіі былі ўрачыста перанесены ў катэдру і змешчаны ў капліцы святога Казіміра. Гэта было трыумфальнае вяртанне святога. Не машына “Победа”, якая для атэістаў сімвалізавала перамогу, а Бог стаў сапраўднай перамогай», — падкрэсліў іерарх.

На заканчэнне гаміліі арцыпастыр перасцярог перад новымі формамі пераследу за веру, якія незаўважна вядуць да выбару свецкага стылю жыцця замест духоўнага.

Завяршыў гамілію іерарх малітвай да св. Казіміра, каб «праз яго заступніцтва Бог дапамагаў перамагаць у змаганні з выклікамі нашага часу дзеля захавання веры, патрэбнай чалавеку для збаўлення».

(DN), (VGr)

 

Пры выкарыстанні матэрыялаў сайта спасылка на Catholic.By абавязкова.

Беларусь - Мінска-Магілёўская архідыяцэзія

28.04 11:32Івянец рыхтуецца да дыяцэзіяльнай сустрэчы моладзі
26.04 10:51«Фэст Божай Міласэрнасці 2017» прайшоў у парафіі Маці Божай Ружанцовай у Мінску
24.04 14:33Біскуп Аляксандр Яшэўскі ў свята Божай Міласэрнасці наведаў парафію ў Асіповічах
21.04 15:22У мінскім Чырвоным касцёле можна атрымаць кансультацыю псіхолага
17.04 14:43Пасхальная вігілія і рэзурэкцыя ў Магілёве: «З пустой грабніцы выпраменьвала Божая любоў»
17.04 09:16Мітрапаліт Кандрусевіч: уваскрасенне Хрыста — непахісны фундамент нашай веры
16.04 02:02«Мы ўсё можам у Хрысце»: Пасхальная вігілія ў мінскай архікатэдры (+фотарэпартаж)
15.04 14:00Апостальскі Нунцый благаславіў святочныя стравы. Фотафакт
14.04 22:39Мітрапаліт Кандрусевіч у Вялікую пятніцу: «Не трэба баяцца крыжа — на ім адбыўся цуд нашага збаўлення» (+фотарэпатаж)
14.04 09:19Біскуп Аляксандр Яшэўскі SDB падчас Імшы Вячэры Пана: «Хто любіць, той хоча служыць іншаму як Езус»