15 мая, ва ўрачыстасць Спаслання Духа Святога, у мінскім архікатэдральным касцёле Імя Найсвяцейшай Панны Марыі Мітрапаліт Мінска-Магілёўскі арцыбіскуп Тадэвуш Кандрусевіч цэлебраваў святую Імшу, падчас якой дзеці прынялі Першую Камунію.

Арцыпастыр падкрэсліў у гаміліі, што Святы Дух «з’яўляецца знакам духоўнага жыцця і дзякуючы сваім сямі дарам нас ажыўляе». Іерарх нагадаў, што праз свайго Духа Езус Хрыстус «прысутны па ўсёй зямлі і дзейнічае сваёй ласкай», прысутны ў гэты дзень і ў мінскай катэдры, дзе дзеці прымаюць Першую Камунію.

«Сёння, дарагія дзеці, упершыню вы наблізіцеся да Езуса, каб прыняць Яго ў свае сэрцы. Вы не бачыце Езуса сваімі вачыма, як бачылі хлопчыкі і дзяўчынкі 2000 гадоў таму. Аднак праз веру і веды, якія вы атрымалі падчас катэхізацыі, вы шмат ведаеце пра Яго», – сказаў Мітрапаліт, звяртаючыся да дзяцей.

«Сёння Ён прыходзіць у дом вашых душаў і сэрцаў. Перад прыняццем Камуніі мы ўсе скажам: “Пане, я не варты, каб Ты ўвайшоў да мяне, але скажы толькі слова, і будзе аздароўлена душа мая”. Гэта азначае, што Езус прыходзіць да нас як лекар нашых душ», – дадаў арцыбіскуп.

Для прыняцця Езуса, па словах іерарха, «патрэбна і духоўная вопратка, гэта азначае стан ласкі». «Мы павінны ўважліва, пабожна і з належнай пашанай да Езуса прымаць удзел у святой Імшы. Мы не можам даць Езусу вады ці ежы, не можам Яго абняць і пацалаваць, як гэта робім з бацькамі і блізкімі. Аднак мы ўшаноўваем Яго падчас Імшы, калі чынім знак крыжа, адказваем на заклікі святара, спяваем рэлігійныя песні, становімся на калені», – адзначыў арцыпастыр.

«Ён становіцца нашай ежай і такім чынам злучаецца з намі, – дадаў іерарх. –Што мы павінны Яму сказаць? Найперш падзякаваць за тое, што захацеў прыйсці да нас. Праслаўляць Яго і ўшаноўваць. Неабходна размаўляць з Ім, выказваць Яму нашу любоў, перапрашаць за ўсе знявагі і маліцца ў канкрэтных інтэнцыях».

Арцыпастыр пажадаў, каб гэты дзень «меў свой працяг і каб гэтыя дзеці як мага часцей прымалі Езуса – іх надзею на шчаслівае жыццё».

Дзецям Мітрапаліт пажадаў «заўсёды крочыць шляхам Хрыста – шляхам праўды, любові і веры», і каб Бог заўсёды апекаваўся імі. Іх бацькоў і блізкіх арцыбіскуп заклікаў даваць ім «добры прыклад хрысціянскага жыцця, частай споведзі і святой Камуніі, бо толькі тады яны будуць выхоўвацца ў хрысціянскіх цнотах і патрэбнай для шчаслівага жыцця і збаўлення Божай ласцы». 

(AG), фота Аляксандры Шчыглінскай