Фота Аўдыё Відэа  
be  ru  pl  en  de info@catholic.by
Трэба маліцца і дзейнічаць, каб Бог учыніў нас здольнымі імкнуцца да адзінства
Беларусь - Мінска-Магілёўская архідыяцэзія
23.01.2011 02:13

22 студзеня 2011 г. прадстаўнікі розных хрысціянскіх канфесій сабраліся на супольнай малітве ў мінскім архікатэдральным касцёле. Набажэнства праходзіла ў межах Тыдня малітваў за адзінства хрысціянаў.

У 1986 г. у Асізі (Італія) па ініцыятыве Яна Паўла ІІ была арганізавана малітва за мір, у якой прынялі ўдзел кіраўнікі амаль усіх хрысціянскіх Цэркваў і супольнасцяў і прадстаўнікі іншых рэлігій. Менавіта гэта сустрэча і стала пачаткам традыцыі малітвы за адзінства хрысціянаў.

Сустрэча ў Мінску распачалася святой Імшой, якую ўзначаліў Апостальскі нунцый у Беларусі арцыбіскуп Марцін Відавіч. Канцэлебравалі літургію Мітрапаліт Мінска-Магілёўскі арцыбіскуп Тадэвуш Кандрусевіч, біскуп Антоні Дзям’янка, Апостальскі візітатар для грэка-католікаў у Беларусі Архімандрыт Сяргей Гаек, шматлікія святары.

«Увесь Касцёл з’яўляецца адным жывым звышпрыродным арганізмам, — падкрэсліў біскуп Дзям’янка ў гаміліі. — Хрыстус з’яўляецца яго галавою… Раздробленае цела азначае, што ўвесь арганізм хворы. Падзел хрысціянаў таксама з’яўляецца знакам хваробы». Экуменічныя намаганні, як далей адзначыў іерарх, спрыяюць вяртанню страчанага праз падзел здароўя.

Прапануем поўны тэкст гаміліі >>>

Пасля літургіі распачалося набажэнства і малітва аб адзінстве хрысцінаў.

Мітрапаліт Кандрусевіч у сваім звароце нагадаў пра нялёгкі лёс першых хрысціянаў, якія, аднак, «верна і мужна трывалі ў навучанні апосталаў і супольнасці, у ламанні хлеба і малітве». «Гэта быў шлях да вытрывання і захавання сваёй хрысціянскай адметнасці, а таксама шлях да нябеснага Ерузалема», — дадаў іерарх.

У той жа час Мітрапаліт Кандрусевіч указаў на адказнасць саміх хрысціянаў за існуючыя паміж імі раздзяленні: «У наш час для рэалізацыі ўзнёслага задання і так жаданага Хрыстом адзінства хрысціянаў патрэбны рэалістычны позірк на нас саміх, бо мы, як ніхто іншы, найбольш адказныя за працяг раздзялення хрысціянаў… Таму нам трэба маліцца і дзейнічаць, каб Бог учыніў нас здольнымі імкнуцца да адзінства».

Поўны тэкст прамовы >>> 

Па словах арцыпастыра, «супольнае сведчанне, а таксама абарона хрысціянскіх каштоўнасцяў і правоў хрысціян, з’яўляюцца адным з галоўных прынцыпаў, на якіх павінен будавацца шлях да адзінства».

Сваё бачанне хрысціянскага адзінства прадставілі і іншыя ўдзельнікі набажэнства.

Архімандрыт Гаек звярнуў увагу ўдзельнікаў набажэнства на тое, што сёння «мы раздзяляем хлеб слова Божага», «хлеб вопыту веры» — радаснага, а часта складанага і балеснага. Іерарх таксама заклікаў маліцца, каб маглі разам даваць сведчанне любові.

«Хрысціянскае адзінства павінна фундавацца на любві да Бога, і шлях павінен быць адзіны — служыць Богу, — адзначыў протаіерэй Аляксандр Шымбалёў. — У разладзе заўсёды крыецца грэх, гардыня і любоў чалавека да самога сябе. Таму, калі мы будзем любіць Бога і адзін аднаго, так, як нам запаведаў Бог, то ўсе будзем адзіныя».

Біскуп саюза Цэркваў евангельскіх хрысціян-баптыстаў Аляксандр Фірысюк звярнуў увагу на агульныя карані хрысціянаў: «Аснова адзінства — гэта ўсведамленне таго, што мы дзеці аднаго Айца Нябеснага. Мы верым у Сына Божага Езуса Хрыста, Збаўцу ўсіх людзей, у нас адна Царква Хрыстовая і адно Валадарства Нябеснае, адна Біблія — слова Божае, адна зямля і адны грахоўныя праблемы людзей, сярод якіх мы жывём і якім імкнёмся служыць. У гэтай духоўнай вайне за выратаванне людзей мы аб’яднаны ў арміі Хрыста, хоць і маем розныя традыцыі і абрады».

«Усе нашы надзеі і ўсё наша адзінства — гэта перш за ўсё Святое Пісанне. Біблія — гэта слова Божае, гэта слова не чалавечае. Таму, калі мы больш удзяляем увагі чытанню Святога Пісання, мы і больш разумеем адно аднаго, і любім адно аднаго», — адзначыў старшыня Біблейскага Таварыства ў Рэспубліцы Беларусь Герман Родаў.

Па словах біскупа Самастойнай евангельска-лютэранскай Царквы ў Рэспубліцы Беларусь Уладзіміра Мейерсана, крочыць да адзінства неабходна ў любові да Бога і бліжняга: «Каб дасягнуць Валадарства Нябеснага паводле наказу Езуса трэба выконваць дзве запаведзі: любі Бога свайго ўсім сваім сэрцам і бліжняга свайго, як самога сябе. Калі будзем так чыніць, будзем ісці наперад».

Такім чынам, «трэба маліцца і дзейнічаць, каб Бог учыніў нас здольнымі імкнуцца да адзінства». 

Фотарэпартаж
 

Пры выкарыстанні матэрыялаў сайта спасылка на Catholic.By абавязкова.

Беларусь - Мінска-Магілёўская архідыяцэзія

23.08 11:27У Будславе адбыўся цыкл рэкалекцый для вілейскай парафіі
17.08 10:52Біскуп Аляксандр Яшэўскі SDB узначаліў парафіяльную ўрачыстасць св. Роха ў мінскай парафіі
16.08 11:04Парафіяльная ўрачыстасць у магілёўскай катэдры: «Быць сведкамі Хрыста праз веру, надзею і любоў»
13.08 20:37Капсулу з каменем са Святой Зямлі заклалі ў сцяну новага касцёла ў Старых Дарогах
13.08 05:41«Тут неверагодны дух!»: удзельнікі — пра «Музычную майстэрню» ў Івянцы
13.08 02:52Мітрапаліт Тадэвуш Кандрусевіч да ўдзельнікаў «Музычнай майстэрні»: «Музыка, якая не мае межаў, аб’ядноўвае веруючых»
08.08 16:32Біскуп Юрый Касабуцкі наведаў з пастырскай візітацыяй парафіі ў Канстанцінаве і Засвіры
08.08 16:046 жніўня міністранты з Мар’інай Горкі завяршылі вандроўныя рэкалекцыі
08.08 12:15Біскуп Аляксандр Яшэўскі SDB наведаў парафію ў Ракаве напярэдадні дня яе апекуна св. Дамініка
07.08 23:09Мітрапаліт Тадэвуш Кандрусевіч наведаў з пастырскай візітацыяй парафію ў Мядзелі (абноўлена)