Фота Аўдыё Відэа  
be  ru  pl  en  de info@catholic.by
Гэта архіў старой версіі сайта. Новая версія знаходзіцца па адрасе catholic.by
Адказны пры ККББ за пастырства Інстытутаў кансэкраванага жыцця скіраваў зварот да манаскіх асобаў
Іерархі
02.02.2017 09:48

«Манаскае жыццё ў нашым Касцёле стала яго сапраўдным сэрцам. І яно будзе нястомна біцца на працягу ўсяго існавання Касцёла», — адзначае ў сваім звароце біскуп Аляксандр Яшэўскі SDB, адказны за пастырства Інстытутаў кансэкраванага жыцця і таварыстваў апостальскага жыцця пры епіскапаце Беларусі. 2 лютага ў Каталіцкім Касцёле адзначаецца Дзень кансэкраванага жыцця.

a Манаскае жыццё — сэрца Касцёла ў Беларусі

Ад пачатку існавання Касцёла было нямала мужчын і жанчын, якія імкнуліся прысвяціць усё сваё жыццё служэнню Богу і хрысціянскай супольнасці. Дзеля рэалізацыі гэтага паклікання яны нават адмаўляліся ад стварэння ўласнай сям’і. Пазней многія з гэтых суполак ператварыліся ў манаскія ордэны і кангрэгацыі, у супольнасці законнікаў і законніц, святароў, братоў і сясцёр, якія жывуць супольным жыццём, склаўшы абяцанні Богу — жыць ва ўбостве, паслухмянасці і чыстасці. Такі стыль жыцця быў афіцыйна прызнаны Касцёлам і называецца манаствам.

Мэта манаства ў Касцёле мае на мэце не адасабленне ад свету, а спрыянне яго збаўленню. Таму манаскае жыццё развіваецца не толькі ў сузіральным, малітоўным накірунку, але і становіцца больш дзейсным, бо сённяшні свет патрабуе сапраўдных сведкаў, якія ўкажуць іншым хрысціянскія каштоўнасці і шлях да Бога.

Гледзячы на служэнне манаскіх асобаў у нашай краіне — Беларусі, бачна, якое адданае іх выключнае служэнне Богу і людзям, як наследуюць яны Езуса на шляху евангельскіх парадаў і з’яўляюцца Яго нябачным сэрцам. Без іх сведчання і адданасці цяжка ўявіць сабе цэласнасць жыцця Каталіцкага Касцёла ў Беларусі. Манаскія асобы асабліва пакліканы да таго, каб прымаць міласэрнасць і дзяліцца ёю з іншымі. Чысціня сэрца і рук, накіроўванне сваёй душы да вечнасці, жыццё ў свабодзе, якую дае праўда, нагадваюць пра тры евангельскія парады, якія праз складзеныя манаскія абяцанні сталі штодзённасцю кансэкраваных асобаў.

Менавіта з евангельскіх парадаў вынікае абавязак манахаў і манахінь клапаціцца пра духоўнае і фізічнае жыццё асобаў, сярод якіх яны служаць, а таксама неабходнасць маліцца ў іх інтэнцыях.

Манаскае жыццё ў нашым Касцёле стала яго сапраўдным сэрцам. І яно будзе нястомна біцца на працягу ўсяго існавання Касцёла, падтрымліваючы яго жыццядайную сілу адданым служэннем, ласкай малітвы на каленях, ахвяраваным постам і нялёгкай працай. Гэтае сэрца будзе біцца далей дзякуючы выслуханым просьбам церпячых і прыгнечаных, дзякуючы руплівай і неадкладнай дапамозе ім. Менавіта манаскія асобы з’яўляюцца «хуткай дапамогай» у нашым Касцёле і выпрошваюць міласэрнасць для нас і для ўсяго свету.

Жадаю ўсім манаскім асобам нашай краіны і тым, хто жадае далучыцца да іх служэння, каб Божая любоў агарнула вас, а мы ўсе разам працягвалі быць руплівымі і бачнымі апосталамі Езуса Хрыста.

Са святам вас!

Ад імя Канферэнцыі Каталіцкіх Біскупаў у Беларусі

+ біскуп Аляксандр Яшэўскі SDB
Адказны за пастырства Інстытутаў кансэкраванага жыцця
і таварыстваў апостальскага жыцця

 

Пры выкарыстанні матэрыялаў сайта спасылка на Catholic.By абавязкова.

Іерархі

01.07 10:47Біскуп Антоні Дзям’янка ў Будславе: «Не варта рабіць з Марыі “краму” для спаўнення жаданняў»
28.06 12:22Паведамленне біскупа Пінскага Антонія Дзям’янкі з нагоды благаслаўлення вуглавога каменя пад новы касцёл Насвяцейшага Сэрца Езуса ў Брэсце
24.06 20:47Беларуская дэлегацыя прыняла ўдзел у біскупскім пасвячэнні кс. Віталія Крывіцкага SDB
19.06 09:58Фотафакт. Апостальскі Нунцый Габар Пінтэр наведаў парафію ў Асіповічах
16.06 11:43Мітрапаліт Кандрусевіч прыняў удзел у міжнародным форуме на тэму барацьбы з карупцыяй
12.06 12:30Паведамленне біскупа Пінскага Антонія Дзям’янкі з нагоды святкавання 400-годдзя асвячэння касцёла ў Ружанах
12.06 08:55Заклік біскупа Аляксандра Яшэўскага да вернікаў Магілёўскага рэгіёна да ўдзелу ў працэсіі Божага Цела
10.06 00:04Адкрыты ліст Мітрапаліта Тадэвуша Кандрусевіча лаўрэату Нобелеўскай прэміі спадарыні Святлане Алексіевіч
24.05 12:27Мітрапаліт Кандрусевіч прымае ўдзел у пасяджэнні італьянскага епіскапату
16.05 13:52«Уражвае дабрыня мясцовых вернікаў»: Апостальскі Нунцый падсумаваў візіт у Віцебскую дыяцэзію