Фота Аўдыё Відэа  
be  ru  pl  en  de info@catholic.by
Гэта архіў старой версіі сайта. Новая версія знаходзіцца па адрасе catholic.by
Біскуп Аляксандр Яшэўскі SDB на аплаткавай сустрэчы з медыкамі: «Як можна забараняць урачам прызнавацца ў рэлігійных поглядах?»
Іерархі
15.12.2016 23:16

15 снежня ў Мінскім абласным клінічным шпіталі ў Бараўлянах адбылася аплаткавая сустрэча дапаможнага біскупа Мінска-Магілёўскай архідыяцэзіі,  біскупскага вікарыя для г. Магілёва і Магілёўскай вобласці Аляксандра Яшэўскага SDB з медперсаналам і пацыентамі шпіталя.

Разам з біскупам на сустрэчы прысутнічалі святары-салезіяне, якія працуюць у Бараўлянах, у супольнасці святога Дамініка Савіо.

Ад імя ўсіх прысутных біскупа прывітаў галоўны ўрач Андрэй Каралько, адзначыўшы, што для ўсёй бараўлянскай бальніцы і для яго асабіста вялікі гонар прымаць такога шаноўнага госця.

На пачатку сустрэчы ў пакоі пагасілі святло і запалілі свечкі, як сімвал самога Хрыста, які, прыходзячы ў гэты свет, жадае збавіць кожнага чалавека.

Звяртаючыся да ўдзельнікаў сустрэчы, біскуп падзякаваў кіраўніцтву шпіталя за тое, што «адгукнуліся на просьбу шматлікіх веруючых і ўжо на працягу года ў пацыентаў ёсць магчымасць кожную сераду ўдзельнічаць у святой Эўхарыстыі, а таксама цяжкахворыя людзі і тыя, хто знаходзіцца на апошняй стадыі свайго жыцця, могуць паяднацца з Богам праз сакрамэнт споведзі і намашчэння хворых, так званы віятык». Каталіцкі іерарх выказаў надзею на тое, што і надалей святары і ўрачы будуць супрацоўнічаць, поруч займаючыся лячэннем душы і цела.

Біскуп выказаў вялікую радасць, што, нягледзячы на канфесійную прыналежнасць, супрацоўнікі сабраліся разам на гэтай сустрэчы, каб святкаваць Божае Нараджэнне.

Таксама іерарх адзначыў, што вельмі занепакоены інфармацыяй, якая з’явілася ў СМІ адносна праекта пастанаўлення аб нормах медыцынскай этыкі. Так, у адным з пунктаў праекта медыцынскім работнікам хочуць забараніць «відавочную дэманстрацыю рэлігійнай прыналежнасці, адкрытае нашэнне рэлігійных знакаў і сімвалаў».

«Я маю вельмі вялікую надзею, што ў нашай краіне, дзе мы будуем сваё жыццё на хрысціянскіх каштоўнасцях, дзе існуе свабода веравызнання і талерантнасць да розных поглядаў і канфесій, такі законапраект ніколі не будзе прыняты, — адзначыў біскуп. — Як сёння магчыма нам, а асабліва вам, медыкам, забараніць прызнавацца ў сваіх рэлігійных поглядах, калі часта таксама і медыкам неаднойчы трэба лячыць у першую чаргу душу чалавека, а пасля цела?»

На заканчэнне прамовы іерарх павіншаваў прысутных з надыходзячымі святамі. «Няхай урачыстасць Божага Нараджэння адорыць кожнага з нас моцаю Бога, які прыходзіць да нас у cваім Сыне. Як жа патрабуе сёння гэтай моцы сучасны чалавек, які часта не ўсведамляе сэнсу свайго жыцця і надзеі, які турбуецца толькі пра сваю часовую будучыню. Менавіта Езус праз сваё нараджэнне прыносіць нам сілу, радасць і святло. Няхай струмень ласкаў нованароджанага Збаўцы напоўніць нашыя сэрцы гэтым каштоўным насеннем. Няхай з гэтага насення народзіцца новы чалавек, створаны паводле Бога ў справядлівасці і святасці праўды», — пажадаў біскуп Аляксандр Яшэўскі.

Пасля благаслаўлення і супольнай малітвы прысутныя дзяліліся аплаткамі, усмешкамі і словамі віншаванняў з біскупам, са святарамі, якія прысутнічалі на сустрэчы, а таксама адно з адным.

А падчас таго, як гэта адбывалася, гучала музычнае суправаджэнне ў выкананні гурта «Небасхіл» з парафіі Св. Яна Хрысціцеля ў Мінску.

Некаторыя пацыенты па добрай хрысціянскай традыцыі панеслі аплаткі ў палатныя пакоі да тых, хто не змог прыйсці на сустрэчу, і падзяліліся такім чынам сваёй радасцю і надзеяй, якія прыносіць свята Божага Нараджэння.

Да некаторых, хто не змог прысутнічаць на сустрэчы, біскуп Аляксандр Яшэўскі SDB у суправаджэнні святароў і ўрачоў завітаў у палаты з благаслаўленнем, віншаваннямі і пажаданнем вытрымкі ў цярпенні, бо кожнае цярпенне мае сэнс, але, каб яго зразумець, неабходны пэўны час.


Уладзіслаў Зарэцкі, фота аўтара

Фотарэпартаж
 

Пры выкарыстанні матэрыялаў сайта спасылка на Catholic.By абавязкова.

Іерархі

01.07 10:47Біскуп Антоні Дзям’янка ў Будславе: «Не варта рабіць з Марыі “краму” для спаўнення жаданняў»
28.06 12:22Паведамленне біскупа Пінскага Антонія Дзям’янкі з нагоды благаслаўлення вуглавога каменя пад новы касцёл Насвяцейшага Сэрца Езуса ў Брэсце
24.06 20:47Беларуская дэлегацыя прыняла ўдзел у біскупскім пасвячэнні кс. Віталія Крывіцкага SDB
19.06 09:58Фотафакт. Апостальскі Нунцый Габар Пінтэр наведаў парафію ў Асіповічах
16.06 11:43Мітрапаліт Кандрусевіч прыняў удзел у міжнародным форуме на тэму барацьбы з карупцыяй
12.06 12:30Паведамленне біскупа Пінскага Антонія Дзям’янкі з нагоды святкавання 400-годдзя асвячэння касцёла ў Ружанах
12.06 08:55Заклік біскупа Аляксандра Яшэўскага да вернікаў Магілёўскага рэгіёна да ўдзелу ў працэсіі Божага Цела
10.06 00:04Адкрыты ліст Мітрапаліта Тадэвуша Кандрусевіча лаўрэату Нобелеўскай прэміі спадарыні Святлане Алексіевіч
24.05 12:27Мітрапаліт Кандрусевіч прымае ўдзел у пасяджэнні італьянскага епіскапату
16.05 13:52«Уражвае дабрыня мясцовых вернікаў»: Апостальскі Нунцый падсумаваў візіт у Віцебскую дыяцэзію