28 жніўня ў мінскім архікатэдральным касцёле адбылася Імша падзякі былога сакратара Апостальскай Нунцыятуры мансеньёра Філіппо Чампанэллі за дыпламатычную місію ў Беларусі. 

 

Падчас Імшы быў прадстаўлены і новы сакратар Апостальскай Нунцыятуры ў Беларусі мансеньёр Марынко Антолавіч.

«Хачу сказаць дзякуй усім вам, пачынаючы з маёй "сям’і" — Нунцыятуры — і заканчваючы ўсімі вамі, з кім мы дзе-небудзь сустракаліся», — адзначыў у сваёй гаміліі мансеньёр Філіппо Чампанэллі. 

 

Святар адзначыў, што час, праведзены ў Беларусі, даў яму новы вопыт і навучыў новаму ў Касцёле. Мансеньёр прыгадаў моманты, якія найбольш уразілі яго падчас дыпламатычнай працы ў Беларусі. Адным з такіх момантаў была працэсія Божага Цела ў Мінску, калі «тысячы вернікаў у маўчанні ўкленчылі перад Гостыяй».

 

 

«Я забіраю з сабою ў Рым вашыя позіркі, якія вы скіроўваеце да Хрыста. Езус казаў, што вока — гэта светач цела. У вас незвычайныя позіркі, яны ўразілі мяне ўнутранасцю жыцця; ахвярнасцю, якую вы перажылі; пакорай, вялікай павагай і годнасцю, — сказаў святар. — Я буду вельмі шмат пра вас распавядаць і буду шчаслівы занесці гэтыя позіркі, пабачаныя мною ў Беларусі, усім, каго сустрэну».

Каментуючы словы літургічнага чытання гэтага дня, святар дадаў: «Тое, што дае моц хрысціянству — гэта прагненне Бога. Мы павінны быць каналам міласэрнасці, праз які праходзіць жыватворчая вада міласэрнасці, каб у прастаце і чысціні мы маглі спазнаваць Бога».

Мансеньёр Філіппо Чампанэллі заахвоціў вернікаў маліцца за святароў, каб «яны сталі прыладай гэтай міласэрнасці».

 

На завяршэнне святой Імшы Апостальскі Нунцый у Беларусі арцыбіскуп Клаўдыё Гуджэроцці, узяўшы слова, падзякаваў прысутным біскупам і вернікам за тое, што прынялі ўдзел у памятным набажэнстве.

«Не так часта бывае, што так шмат біскупаў збіраюцца разам на адну Імшу. Для мяне гэта знак таго, што Апостальская Нунцыятура — таксама адна з важных частак Касцёла», — сказаў прадстаўнік Папы.

Скіроўваючы словы да мансеньёра Філіппо Чампанэллі, арцыбіскуп дадаў, што мансеньёр заўжды разглядаў святарства як прыярытэт свайго жыцця, таму гэта дапаможа яму ў далейшым на Божай службе, каб несці Хрыста іншым народам.

Кажучы пра беларускіх вернікаў, Апостальскі Нунцый адзначыў іх натуру, якая «больш далікатная, чым у італьянцаў» і якую беларусы «стараюцца схаваць ад іншых». Арцыбіскуп Клаўдыё Гуджэроцці звярнуў таксама ўвагу на тое, што Апостальская Нунцыятура імкнецца, «каб дом Папы ў Беларусі быў домам гасцінным».

Прадстаўнік Папы дадаў, што Нунцыятура актыўна ўдзельнічае ў грамадскім і палітычным жыцці краіны, і запэўніў, што яна будзе рабіць гэта і надалей.

 

«Мы былі сведкамі скрыжаванняў у гісторыі вашага народа, які перажываў розныя падзеі. Мы таксама былі сведкамі і той любові, якую да вашага народа мае Пантыфік. Былі сведкамі тых сімвалічных жэстаў да грамадства, якія падкрэслівалі любоў Папы да гэтай краіны», — сказаў арцыбіскуп.

Напрыканцы прамовы Апостальскі Нунцый яшчэ раз падзякаваў мансеньёру Філіппо Чампанэллі за чулае сэрца і працу на карысць беларускага народа.

 

 

У сваю чаргу Мітрапаліт Тадэвуш Кандрусевіч ад імя Канферэнцыі Каталіцкіх Біскупаў у Беларусі і ўсіх беларускіх католікаў падзякаваў мансеньёру Філіппо за «сведчанне любові і прыклад веры». 

На развітанне мансеньёру Філіппо Чампанэллі быў падараваны крыж у знак памяці пра Беларусь, каб, «гледзячы на яго, мансеньёр прыгадваў Беларусь і яе вернікаў». Мансеньёру Марынко Антолавічу — новаму сакратару Апостальскай Нунцыятуры — быў уручаны букет ружаў колеру ватыканскага сцяга.