«Беларускія студэнты, не чакаючы адкрыцця Тэалагічнай акадэміі імя св. Яна Паўла ІІ у Мінску, змогуць распачаць дыстанцыйнае навучанне ў Тэалагічным інстытуце Бірмінгема», — пра гэта карэспандэнту Catholic.by паведаміў арцыбіскуп Тадэвуш Кандрусевіч, які знаходзіцца з візітам у Вялікабрытаніі.

Паводле слоў беларускага іерарха, у выніку сустрэчы з кіраўніцтвам Тэалагічнага інстытута Бірмінгема бакі ўзгаднілі пытанні супрацоўніцтва. Адным з пунктаў стала абмеркаванне магчымасцяў навучання беларускіх студэнтаў у Бірмінгеме.

«Выпускнікі атрымаюць зацверджаныя Ватыканам дыпломы, — дадаў беларускі арцыпастыр. — Для дыстанцыйнай вучобы неабходна, аднак, валодаць англійскай мовай».

У той жа дзень адбылася таксама сустрэча арцыбіскупа Тадэвуша Кандрусевіча з бірмінгемскім ардынарыем арцыбіскупам Бернардам Лонглі.

Паводле слоў Мітрапаліта Тадэвуша Кандрусевіча, арцыбіскуп Лонглі паабяцаў свой удзел у арганізацыі навуковага працэсу ў будучай Тэалагічнай акадэміі імя св. Яна Паўла ІІ з мэтай перадачы досведу Тэалагічнага інстытута ў Бірмінгеме, у прыватнасці, вопыту дыстанцыйнага навучання.

Таксама беларускі іерарх прыняў удзел у цырымоніі ўручэння дыпломаў выпускнікам, магістрам і навукоўцам са ступенню доктара Тэалагічнага інстытута Бірмінгема.

«Гэта была вельмі прыгожая цырымонія з прафесарскімі ўбраннямі розных колераў, адпаведна спецыяльнасцям і ўніверсітэтам, якія яны прадстаўлялі», — зазначыў арцыбіскуп Тадэвуш Кандрусевіч.

У цырымоніі, якую ўзначаліў арцыбіскуп Бернард Лонглі, акрамя беларускага іерарха прынялі ўдзел таксама ардынарый дыяцэзіі Данкэлд у Шатландыі біскуп Стывен Робсан і дапаможны біскуп Бірмінгема Роберт Бэрн.

(IL)