У Мінску завяршыўся семінар «Праблема бясплоднасці і шляхі яе вырашэння», які праходзіў у касцёле свв. Сымона і Алены 22 лістапада. Папярэднічала семінару святая Імша, якую ўзначаліў Мітрапаліт Мінска-Магілёўскі арцыбіскуп Тадэвуш Кандрусевіч.

У сваёй гаміліі іерарх зазначыў, што праблема бясплоднасці была вядома яшчэ за часамі Хрыста і сваёй актуальнасці не страціла і сёння.

«Сённяшняе Евангелле нагадвае пра бяздзетнасць. Слухачы Езуса клапаціліся пра патомства ў сваім родзе, бо бяздзетнасць у габрэйскім народзе лічылася знакам адсутнасці Божага благаслаўлення.

Нездарма радаваліся Альжбета і Захарыя, калі ў іх, ужо старых, нарадзілася дзіця — святы Ян Хрысціцель. У Старым Запавеце мы таксама можам знайсці і іншыя падобныя прыклады. Нараджэнне дзіцяці заўсёды з’яўляецца знакам Божай прыхільнасці і благаслаўлення.

Поўны тэкст гаміліі тут

«Сучасны свет вельмі добра бачыць, куды ён можа зайсці, калі будзе абапірацца толькі на навуку і выкарыстоўваць яе не згодна з маральнымі прынцыпамі, — звярнуў увагу Мітрапаліт. — Калі навука і рэлігія дапамагаюць адзін аднаму, то чалавецтва атрымлівае задавальняючыя вынікі. Тое ж самае і ў галіне лячэння бясплоднасці».

«Будаваць разам цывілізацыю жыцця»

Як адзначыў арцыбіскуп падчас прывітальнага слова на адкрыццё семінара, заданне Касцёла не толькі ў падрыхтоўцы людзей да сакрамэнту сужэнства, але і ў тым, каб суправаджаць іх і пасля сакрамэнту сужэнства.

Іерарх распавёў пра свой удзел у ІІІ Надзвычайнай сесіі Сінода Біскупаў, які праходзіў у Рыме на тэму сям’і.

Арцыпастыр падкрэсліў, што праблема бясплоднасці ў сем’ях з’яўляецца вялікай бядой і заклікаў удзельнікаў семінара будаваць разам цывілізацыю жыцця, каб «Беларусь засталася краінай жыцця».

Арганізатарам семінара выступілі Рада па справах сям’і пры Канферэнцыі Каталіцкіх Біскупаў Беларусі і Душпастырства сем’яў Мінска-Магілёўскай архідыяцэзіі.

Дакладчыкамі на форуме былі ўрач-гінеколаг Таццяна Ермаловіч, міждыяцэзіяльны дарадчык сем’яў у Беларусі Барбара Сайнок, доктар-акушэр з Польшчы Тадэвуш Васілеўскі і сацыяльны педагог Марына Нямарская.

Семінар сабраў каля 150 удзельнікаў.

Ілья Лапато