Фота Аўдыё Відэа  
be  ru  pl  en  de info@catholic.by
Гэта архіў старой версіі сайта. Новая версія знаходзіцца па адрасе catholic.by
Біскуп Аляксандр Кашкевіч у Росі: «Пачуйма голас Езуса, які кліча нас па імені»
Беларусь - Гродзенская дыяцэзія
08.08.2016 16:48

7 жніўня скончыліся ўрачыстасці ў санктуарыі Езуса Журботнага ў Росі. Святую Імшу з удзелам пілігрымаў, якія прыбылі з розных куткоў дыяцэзіі, цэлебраваў біскуп Гродзенскі Аляксандр Кашкевіч.


Вернікі сабраліся ў санктуарыі, каб ушанаваць фігуру Езуса Журботнага, бо бачаць у ёй знак асаблівай блізкасці Езуса Хрыста, які ніколі не перастае адорваць незлічонымі ласкамі і звышнатуральнымі дарамі.

 

«Сёння мы прыходзім сюды, як гэта рабілі нашыя продкі, каб з верай і пакорай стаць на калені перад фігурай Езуса Журботнага і ў цішыні сэрца пачуць Яго голас, які кожнага з нас кліча па імені з любоўю, клопатам і бясконцай міласэрнасцю», — адзначыў у гаміліі біскуп Аляксандр Кашкевіч.



Іерарх падкрэсліў, што праз фігуру Езуса Журботнага Бог асаблівым чынам прамаўляе да чалавека, нагадваючы кожнаму пра справу Адкуплення, якая была здзейснена праз муку, смерць і ўваскрасенне Ягонага Сына.
«Езус Журботны, гледзячы на нас з гэтай славутай ласкамі фігуры, пытаецца, ці мы, як хрысціяне, умеем і хочам заўважаць цярпенні нашых бліжніх, ці ўмеем убачыць у нашым браце або сястры, якія пакутуюць, аблічча Збаўцы», — сказаў біскуп.



Кусташ санктуарыя ксёндз канонік Чэслаў Паўлюкевіч падзякаваў усім пілігрымам за пілігрымаванне і запэўніў, што дзверы санктуарыя заўсёды адчынены, а таксама заахвоціў наведваць гэтае святое месца часцей.

Кс. Юрый Марціновіч, grodnensis.by

 

Пры выкарыстанні матэрыялаў сайта спасылка на Catholic.By абавязкова.