23-26 ліпеня ў Вышэйшай духоўнай семінарыі ў Гродне адбыліся рэкалекцыі «Распазнанне паклікання». У рэкалекцыях прынялі ўдзел каля 40 маладых людзей з розных парафій Гродзенскай дыяцэзіі.
У праграме рэкалекцый былі канферэнцыі, святая Імша, адарацыя, ранішняя і вячэрняя малітвы, магчымасць прыступіць да сакрамэнту пакаяння, размовы з духоўным айцом і семінарыстамі. Рэкалекцыі далі маладым людзям магчымасць задумацца над сваім жыццём і над тым, ці з’яўляецца іх пакліканнем шлях святарства.
Падчас рэкалекцый удзельнікам служылі дапамогай, словам і парадай мадэратары семінарыі, духоўныя айцы і семінарысты.
Ксёндз Валерый Быкоўскі, які апошнія некалькі гадоў з’яўляўся духоўным айцом семінарыі, падчас рэкалекцый заахвочваў удзельнікаў адкрыць сэрцы на дзеянне Духа Святога, адзначаючы, што важны элемент падчас такіх рэкалекцый - уважліва прыслухоўвацца да голасу Бога, каб распазнаць сваё пакліканне.
Святар падкрэсліў таксама важнасць цішыні і засяроджанасці, неабходных для пошуку сэнсу свайго жыцця.
Праграма кожнага дня духоўных практыкаванняў была вельмі насычанай і нагадвала звычайны дзень семінарыста. Кожны дзень пачынаўся малітвай у капліцы – месцы, дзе сабраныя праводзілі шмат часу на каленях, як на індывідуальнай малітве, так і на супольнай адарацыі.
Таксама ўдзельнікі наведалі Узгорак надзеі ў Капцёўцы, дзе знаходзіцца дыяцэзіяльны санктуарый Маці Божай Яснагорскай Цярпліва Слухаючай. Там яны прынялі ўдзел у святой Імшы, якую цэлебраваў дапаможны біскуп Гродзенскай дыяцэзіі Юзаф Станеўскі. Іерарх заахвоціў маладых людзей прысвяціць сваё жыццё выключна Богу.
Тыя, хто яшчэ не разпазнаў голас паклікання і яшчэ вучыцца ў школе, вярнуліся дадому. А тыя, хто ўжо адчувае сябе гатовым адказаць на заклік Хрыста “Ідзі за Мной” і завяршылі вучобу ў школе, атрымаўшы атэстат, прадставілі неабходныя дакументы і рэкамендацыйны ліст ад свайго пробашча і здалі ўступны экзамен у семінарыю.
Такім чынам 27 ліпеня ў гродзенскую ВДС было прынята шэсць новых кандыдатаў, якія ўжо 20 жніўня распачнуць вучобу і семінарыйную фармацыю.
Кс. Юрый Марціновіч
|