Па традыцыі ў першую нядзелю чэрвеня ў Гродзенскай дыяцэзіі адзначаецца Дыяцэзіяльны дзень бацькі. У гэты дзень ва ўсіх святынях дыяцэзіі моляцца за жывых і памерлых бацькаў.

 На Узгорку надзеі пілігрымаў прывітаў кс. Міхал Ластоўскі, кусташ санктуарыя, які заахвоціў іх даверыць сябе Найсвяцейшай Маці, заўсёды гатовай цярпліва слухаць сваіх дзяцей. Святар заклікаў таксама да асаблівай малітвы ў інтэнцыі ўсіх бацькаў.

Традыцыйна пілігрымаў чакала ў Капцёўцы багатая духоўная праграма. На пачатку вернікі сабраліся ў санктуарыі на малітве Вяночка да Божай Міласэрнасці. Дарэчы, набажэнства да Божай Міласэрнасці праводзіў ксёндз прэлат Юрый Лявінскі, які сёлета адзначае 60-ю гадавіну прэзбітэрскага пасвячэння.

Канферэнцыю на тэму навяртання ў сувязі з Годам навяртання, які перажываецца ў Каталіцкім Касцёле ў Беларусі, прамовіў кс. Юрый Марціновіч. Святар нагадаў, што навяртанне – нястомны працэс, які павінен трываць усё жыццё. Пры навяртанні, па словах кс. Юрыя Марціновіча, “чалавек адкрывае, што з’яўляецца Божым дзіцём, што мае шанс на жыццё ў святасці, радасці і міры толькі тады, калі жыве ў прысутнасці Бога”.

“Кожнаму чалавеку патрэбна навяртанне. І Езус прыйшоў да кожнага з нас, - адзначыў таксама святар. – Важна, каб не змарнаваць ніводнага дня. Важна, каб, ужо праз хвіліну пасля таго, як забыўся пра гэта, вярнуцца, прааналізаваць, стаць у праўдзе, у пакоры перад Богам і зрабіць рахунак сумлення”.

Пілігрымы прынялі ўдзел таксама ў набажэнстве Крыжовага шляху.

Урачыстую Імшу на заканчэнне пілігрымкі ўзначаліў кс. Міхал Ластоўскі. Гамілію прамовіў кс. Юрый Марціновіч, заахвоціўшы ў ёй да служэння адзін аднаму. “Нам усім трэба кожны дзень служыць адзін аднаму”, - сказаў святар і, звяртаючыся да прысутных у святыні бацькаў, заклікаў іх кожны дзень імкнуцца служыць на карысць сваёй сям’і. “Служэнне сёння нямоднае; людзі не любяць дапамагаць адзін аднаму, спяшацца насустрач адзін аднаму з дапамогай, але такая воля Бога, гэтага патрабуе ад кожнага з нас сам Езус Хрыстус. Гэта менавіта Ён пакінуў нам усім узор пакорнага служэння”, - дадаў святар.

У гэты дзень адбылася і пешая пілігрымка бацькаў сем’яў з Ашмян у парафіяльную святыню ў Барунах, дзе таксама маліліся ў інтэнцыі бацькаў дыяцэзіі. У пілігрымцы таксама ўдзельнічалі навучэнцы семінарыі ў Гродне.

(JM)