Фота Аўдыё Відэа  
be  ru  pl  en  de info@catholic.by
Гэта архіў старой версіі сайта. Новая версія знаходзіцца па адрасе catholic.by
Сакратар Апостальскай Нунцыятуры сустрэўся з моладдзю душпастырства «OPEN»
Беларусь - Гродзенская дыяцэзія
25.10.2014 12:26

23 кастрычніка ў межах традыцыйнай сустрэчы Душпастырства студэнцкай і працуючай моладзі Гродна «OPEN» з моладдзю душпастырства сустрэўся мансіньёр Філіппо Чампанэллі, сакратар Апостальскай Нунцыятуры ў Беларусі.

Сакратар Апостальскай Нунцыятуры ўзначаліў святую Імшу і звярнуўся да маладых вернікаў з гаміліяй, у якой сярод іншага згадаў аб сваёй размове праз скайп-сувязь з маладымі італьянскімі сябрамі. Мансіньёр Філіппо Чампанэллі распавёў пра іх здзіўленне, калі яны даведаліся, што моладзь у Беларусі выкарыстоўвае скайп не толькі для размовы, але і для малітвы на ружанцы.

Па словах святара, яго сябры з Італіі падкрэслілі, што моладзь з Беларусі - святая. Удзельнікі душпастырства «OPEN» адзначаюць, што, напэўна, гэтыя словы прагучалі як пахвала, але больш - як заданне, каб сапраўды быць святымі ў сучасным свеце.

Пасля Імшы адбылася сустрэча і цёплая размова сакратара Апостальскай Нунцыятуры з моладдзю. Падчас размовы панавала атмасфера радасці, уважлівасці, зацікаўленасці, адчувалася ўзаемная адкрытасць. Маладыя вернікі расказалі пра тое, чым яны займаюцца і чаму збіраюцца на душпастырства.

Падчас расповеду аб сваім жыццёвым шляху госць падзяліўся тым, што паўплывала на яго веру: гэта былі між іншым удзел у Сусветным дні моладзі ў Чэнстахове і набыццё абразка Маці Божай з Дзіцяткам Езусам.

Мансіньёр Філіппо Чампанэллі адказаў на пытанні маладых вернікаў - аб працы ў Апостальскай Нунцыятуры, аб тым, як ён ставіцца да моладзі і якое было самае забаўнае здарэнне падчас яго святарскага служэння з маладымі італьянцамі. Святар пацікавіўся і стаўленнем моладзі да людзей са слабой верай або зусім няверуючых і тым, як хрысціянская вера дапамагае ўдзельнікам душпастырства «OPEN» у жыцці. Моладзь ахвотна падзялілася досведам перадачы веры ў сваім асяроддзі.

На заканчэнне не абышлося без падарункаў і запрашэння наведаць моладзь яшчэ не адзін раз, якое скіравалі да сакратара Нунцыятуры маладыя вернікі. Для гісторыі душпастырства «OPEN» была зроблена памятная фатаграфія.

(AG)

 

Пры выкарыстанні матэрыялаў сайта спасылка на Catholic.By абавязкова.