2 снежня — Міжнародны дзень барацьбы за адмену рабства, які звязаны з датай прыняцця Генеральнай Асамблеяй ААН Канвенцыі аб барацьбе з гандлем людзьмі і эксплуатацыяй прастытуцыі трэцімі асобамі 2 снежня 1949 года.

Мэта гэтага дня — спрыяць выкараненню сучасных форм рабства.

Адной з вызначальных прыкмет часу Папа Ян Павел ІІ для сучаснага чалавека вызначаў глабальнае паскарэнне пошуку свабоды, якая з’яўляецца адной з найвялікшых рухаючых сіл чалавечай гісторыі.

У звароце да ААН у 1995 годзе Пантыфік адзначаў, што «гэты феномен не абмяжоўваецца якойсьці адной часткай свету, і ён не з’яўляецца выражэннем нейкай асобнай культуры. Мужчыны і жанчыны па ўсім свеце, нават калі ім пагражала насілле, пайшлі на гэтую рызыку свабоды, просячы прадставіць ім месца ў сацыяльным, палітычным і эканамічным жыцці, якое суразмерна з іх годнасцю свабодных людзей. Гэтае сусветнае імкненне да свабоды з’яўляецца сапраўды адным з вызначальных знакаў нашага часу».

Гэта імкненне да свабоды і пратэст супраць розных форм рабства, такіх, як гандаль людзьмі, выкарыстанне дзяцей у ваенных дзеяннях, эксплуатацыя працоўных, асабліва дзіцячай працы, нелегальны гандаль наркотыкамі, прастытуцыя — з’яўляюцца знакамі грамадства пачатку ХХІ стагоддзя.

Мастацтва як адзін з інструментаў змагання з рабствам

Прадстаўнікі ААН з году ў год выкарыстоўваюць розныя формы барацьбы з гэтай заганай, у тым ліку і мастацтва. Напрыклад, у сакавіку 2015 года на тэрыторыі штаб-кватэры ААН у Нью-Ёрку была прадстаўлена скульптура, прысвечаная ахвярам трансатлантычнага гандлю рабамі — «Каўчэг вяртання».

Таксама існуе шэраг вельмі выразных і прамаўляючых скульптур у іншых краінах свету.

Помнік, прысвечаны дню адмены рабства, на востраве Марцініка

Помнік ахвярам рабства ў Занзібары

На сённяшні дзень у свеце 21 мільён жанчын, мужчын і дзяцей жывуць у рабстве.

Супраць рабства выступае разам з рознымі міжнароднымі арганізацыямі Каталіцкі Касцёл. Напрыклад, для першага дня 2015 года — 48-га Сусветнага дня міру — Папа Францішак абраў тэму «Больш не рабы, але браты». З гэтай нагоды было апублікавана спецыяльнае паведамленне, у якім адзначаецца, што рабства не з’яўляецца з’явай мінулага, як гэта магло б здавацца, але «сацыяльнай язвай, якая прысутнічае ў сучасным свеце» і «наносіць смяротны ўдар гэтаму паўсюднаму братэрству і, такім чынам, міру».

Адзначаецца, што «для таго, каб эфектыўна супрацьстаяць феномену сучаснага рабства, неабходна паўсюднае прызнанне непарушнай годнасці кожнай чалавечай асобы, моцнае ўсведамленне братэрства, перамога над няроўнасцямі, з прычыны якіх чалавек становіцца рабом іншага чалавека, а таксама пастаянная блізкасць і бескарыснасць, на шляху вызвалення і ахоплівання ўсіх», паведамляе Ватыканскае радыё.

У красавіку 2015 года Пантыфік таксама заклікаў прадстаўнікоў Папскай акадэміі сацыяльных навук як мага лепш інфармаваць грамадзянскія ўлады аб сур'ёзнасці і небяспецы гэтай заганнай з'явы, ліквідацыя якой дапаможа зрабіць свет лепшым.

Таксама супраць рабства выступае Міжнародная арганізацыя працы, у якой трывае акцыя «Канец рабству сёння». У ёй прымаюць удзел шматлікія знакамітыя мастакі, спартсмены і грамадскія дзеячы, такія, як Ганс Цімер, Міла Куніс, Олівер Стоўн, Марыя Бэло і інш.