У Ляскоўцы завяршыўся семінар з удзелам кіраўнікоў каталіцкіх СМІ |
Беларусь |
26.06.2013 16:11 |
Семінар для кіраўнікоў каталіцкіх СМІ адбыўся 24–26 чэрвеня ў Ляскоўцы пад Мінскам. Семінар праходзіў пад кіраўніцтвам эксперта з Германіі Сафіі Януш, супрацоўніцы каталіцкага медыясавета CAMECO. На семінар былі запрошаны кіраўнікі буйных каталіцкіх электронных і друкаваных СМІ з усіх дыяцэзій Беларусі, прадстаўнікі каталіцкага выдавецтва «Pro Christo», адказныя за СМІ пры дыяцэзіях. У працы семінара прымаў удзел таксама адказны за СМІ пры Канферэнцыі Каталіцкіх Біскупаў у Беларусі Мітрапаліт Мінска-Магілёўскі арцыбіскуп Тадэвуш Кандрусевіч. «Сустрэча адбывалася ўпершыню на такім узроўні. Вельмі важным было тое, што методыка працы самога семінара дапамагла раскрыць сітуацыю, у якой знаходзяцца сёння нашы СМІ, — адзначыў у гутарцы з Catholic.by Мітрапаліт Тадэвуш Кандрусевіч. — Былі закрануты праблемы, з якімі сустракаюцца нашыя СМІ. Узнятыя пытанні паказалі недапрацоўкі ў каардынацыі і супрацоўніцтве паміж нашымі СМІ, недахоп кадраў, недахопы ў вырашэнні матэрыяльна-фінансавай базы, праблему заангажаванасці духоўных і свецкіх членаў Касцёла ў працы СМІ». Вынікам трохдзённага семінара стала рашэнне аб заснаванні асобнага каталіцкага медыяцэнтра, задачай якога стане каардынацыя працы каталіцкіх СМІ, аналіз працы СМІ і выпрацоўка агульнай канцэпцыі іх далейшага развіцця. Даведка: CAMECO — каталіцкі медыясавет кансалтынгавых паслуг у сферы сродкаў масавай камунікацыі ў Афрыцы, Азіі, Лацінскай Амерыцы, Цэнтральнай і Усходняй Еўропе, на Блізкім Усходзе і ў Ціхаакіянскім рэгіёне. Кампанія прадастаўляе свае паслугі мясцовым арганізацыям з Германіі, якія выступаюць донарамі і часта з'яўляюцца рэлігійнымі арганізацыямі. Ілья Лапато OCDS |
Фотарэпартаж |