1 лютага 2010 г. у мінскім касцёле Узвышэння Святога Крыжа адбылася сустрэча святароў Кальварыйскага дэканату. Душпастыры ўшанавалі Хрыста ў Найсвяцейшым Сакрамэнце, прынялі ўдзел у канферэнцыі і, канцэлебруючы святую Імшу, памаліліся за душы памерлых кс. Яна Адамовіча і кс. Альберта Масальскага, якія працавалі ў гэтым касцёле.

Ксёндз Андрэй Бародзіч, дэкан Кальварыйскі, нагадаў, што пакліканне да святарскага служэння з’яўляецца дарам Божым, а не заслугаю чалавека, пасля чаго заахвоціў прысутных да малітвы за тых святароў, дзякуючы прыкладу якіх яны адчулі заклік Бога.

Пасля Эўхарыстыі адбылася арганізацыйная частка сустрэчы, падчас якой аднагалосна былі абраны віцэ-дэкан Кальварыйскага дэканату — кс. Францішак Рудзь, духоўны айцец — а. Аляксандр Улас OFMConv і сакратар — кс. Віталій Янкевіч.

У межах сустрэчы адбылося абмеркаванне пытанняў, звязаных з дзейнасцю новаўтвораных парафій, а таксама была адзначана неабходнасць узаемнай дапамогі ў парафіях дэканату падчас вялікапосных рэкалекцый.

Дэканальная сустрэча прайшла ў атмасферы узаемапавагі, святарскай салідарнасці і братэрства.