Беларускіх хрысціянскіх музыкаў запрашае 20-21 жніўня фестываль-конкурс «Laudato Si», які пачаў збор сродкаў на краўдфандынгавым сайце Ulej.by.

«Ідэя гэтага фестывалю ў тым, каб дапамагчы хрысціянскім музыкам Беларусі ў прафесійным і творчым развіцці. Мы прапаноўваем ім выходзіць на большыя пляцоўкі і аўдыторыі, арганізоўваць самастойныя гурты і калектывы, пісаць уласныя спевы і заўсёды імкнуцца наперад!» — кажа дырэктар фестывалю Андрэй Лугін, кіраўнік хрысціянскага гурта «Laudans».

Фестываль адбудзецца ў аграгарадку Беразінскае ў Маладзечанскім раёне.

20 жніўня адбудзецца конкурсная частка, 21 жніўня — святочны гала-канцэрт з удзелам пераможцаў і зоркі вечара, а таксама духоўны і музычны адпачынак.

«Прагучыць шмат цікавых спеваў, будуць розныя сустрэчы і малітвы разам, а вакол — прыгажосць прыроды! Гэтым фестывалем мы хочам выявіць аўтараў і выканаўцаў хрысціянскай музыкі ў грамадстве, а таксама такім чынам займацца новай евангелізацыяй», — распавядае духоўны кіраўнік свята ксёндз Сяргей Бараўнёў.

Праграма

20 жніўня

9.30 — рэгістрацыя
11.00 — праслухоўванні
14.00 — абед
15.00 — праслухоўванні
18.00 — святая Імша
19.00 — вячэра
20.00 — вячэрняя малітва спевам
21.00 — спеў ля вогнішча

21 жніўня

8.30 — сняданак
10.00 — музычная канферэнцыя
12.00 — святая Імша
13.00 — абед
13.30 — супольнае выкананне вядомых хрысціянскіх песень
14.30 — духоўная канферэнцыя
15.00 — аб’яўленне пераможцаў, канцэрт з іх удзелам
16.30 — канцэрт зоркі вечара

«Заклікаем вас, дарагія сябры, далучыцца да нашай агульнай справы і матэрыяльна падтрымаць наш фестываль! Мы хочам, каб фестываль "Laudato Si" прайшоў на высокім узроўні і з года ў год станавіўся лепей. Вядома, што такая падзея патрабуе шмат затратаў», — гаворыцца ў абвестцы.

Ulej.by (АлГ)