З 5 кастрычніка ў архікатэдральным касцёле Імя Найсвяцейшай Панны Марыі ў Мінску будуць праводзіцца «Вечары для закаханых». Пачатак у 19.00.

Да ўдзелу ў «Вечарах» запрашаюцца ўсе пары, якія пакуль толькі сустракаюцца, якія ўжо вырашылі ажаніцца і якія нават пра гэта яшчэ не думаюць. У «Вечарах» могуць браць удзел пары закаханых незалежна ад канфесійнай прыналежнасці.

Такія сустрэчы — магчымасць распазнаць сваё пакліканне, паглыбіць свае адносіны, а магчыма, і прыняць рашэнне на будучыню.

«Вечары для закаханых» — дзевяць сустрэч, якія доўжацца 2 – 2,5 гадзіны і праводзяцца адзін раз на тыдзень. У сустрэчах могуць браць удзел толькі абое закаханыя. Сустрэчы праводзяцца сужэнскай парай і святаром, аніматарамі руху «Сужэнскія сустрэчы».

Асноўным метадам працы на «Вечарах» з’яўляецца праца закаханых толькі ўдваіх. Штуршком да яе з'яўляюцца ўступы і сведчанні сужэнскіх пар і святароў. Удзельнікі ў сваіх парах маюць магчымасць глыбей пазнаёміцца са сваімі рысамі асобы, чаканнямі, вызначаюцца з агульнай сістэмай каштоўнасцяў у жыцці, вучацца, як вырашаць праблемы і будаваць гармонію сваіх адносін. Яны стараюцца зразумець, у чым сутнасць таямніцы шлюбу, адкрываюць месца веры ў сваім жыцці, даведваюцца пра асноўныя палажэнні вучэння Касцёла пра шлюб і сям’ю.

«Вечары» прызначаны як для заручаных, так і для пар, якія сустракаюцца адно з адным без вызначанай даты вяселля, але сур'ёзна думаюць пра шлюб. У праграме таксама могуць удзельнічаць пары закаханых, якія яшчэ не думалі пра шлюб, але жадаюць паглыбіць свае веды пра сужэнства і сям’ю.

Стварэнне сям’і — адказны працэс, звязаны з прыняццем сур’ёзных рашэнняў на ўсё жыццё. Праграма «Вечароў для закаханых» прапануе:

• навучанне дыялогу — дарозе ўзаемнага спазнання як падчас сустрэч адно з адным, у перыяд заручын, так і на працягу магчымага будучага шлюбнага жыцця,
  
• лепшае спазнанне рыс асобы, чаканняў, планаў, поглядаў, жыццёвых установак людзей, з якімі плануюць звязаць сваё жыццё,
  
• глыбейшае разуменне значэння таямніцы шлюбу і слоў шлюбнай прысягі,
• правядзенне аналізу, наколькі планы сумеснага жыцця дакладныя і сталыя. 
  

«Вынікам “Вечароў для закаханых” з’яўляюцца моцныя сем’і, дзе пануе любоў і згода, дзе сужэнцы слухаюць адно аднаго, дзеляцца сабою, разумеюць сваю другую палавінку і заўсёды гатовыя прабачаць», — адзначаюць арганізатары.

Кантактны нумар для запісу:

+375 29 622 28 24 Алена Бражнікава

(AG)