У Мінску будзе асвячона новая капліца |
Анонсы |
02.07.2012 12:56 |
Вернікі парафіі Божага Цела ў Мінску разам з супольнасцю айцоў кармэлітаў босых з вялікай радасцю запрашаюць на ўрачыстасць асвячэння капліцы Маці Божай Шкаплернай. Адбудзецца яна 3 ліпеня і распачнецца літургіяй а 15-й гадзіне. Святую Імшу ўзначаліць Мітрапаліт Мінска-Магілёўскі арцыбіскуп Тадэвуш Кандрусевіч. Капліца знаходзіцца па вул. Герасіменкі, 8 (каля г/к «Алмаз»). Менш за год таму, 8 жніўня 2011 г. у мікрараёне «Ангарская» адбылося асвячэнне крыжа і пляцоўкі пад будаўніцтва капліцы Маці Божай Шкаплернай, а пасля — касцёла Божага Цела. Дагэтуль у Завадскім раёне сталіцы не было ніводнага культавага месца малітвы хрысціянаў. Аб заснаванні парафіі Божага Цела ў Мінску было вырашана падчас святкавання ў Касцёле Года Эўхарыстыі (2005 г.). Падпісаў гэтае рашэнне кардынал Казімір Свёнтэк. Выкананне заснавання парафіі было даручана кс. Ігару Лашуку. Пасля тагачасны Апостальскі Адміністратар Мінска-Магілёўскай архідыяцэзіі біскуп Антоні Дзям’янка даручыў апеку парафіяй айцам кармэлітам босым. 18 студзеня 2007 г. парафія Божага Цела ў Мінску была зарэгістравана. Спачатку вернікі збіраліся на малітву ў прыватных памяшканнях, а пасля (з павелічэннем колькасці парафіянаў) — у актавай зале ЖЭСа №74. У 2010 г. быў абраны ўчастак зямлі пад будаўніцтва святыні, а праз год выдзены парафіяльнай супольнасці. |